O letrado José Eugenio Galindo González acode ao seu despacho na Deputación de Ourense todas as mañás de luns a venres desde o ano 1988.
Ás portas de soprar 67 velas e con máis de 30 anos de experiencia ás súas costas formando parte do gabinete xurídico da institución, actualmente como xefe de servizo, xa solicitou a segunda das cinco prórrogas ás que pode optar para continuar en activo antes de alcanzar "a xubilación forzosa".
O seu despacho segue sendo o mesmo que cando chegou á Deputación, e as súas ganas, a pesar do paso dos anos, tampouco se viron mermadas. "Sigo traballando porque non estou canso, atópome ben e non quero aburrirme", comenta. Aínda que o avogado acode todas as mañás á súa oficina nos corredores da institución ourensá, a súa xornada laboral non conta cun horario fixo. Isto débese a que as horas de actividade deste profesional dítanas os tribunais cos que traballa.
Así mesmo, Galindo González puntualiza que as súas tarefas non son cousa dunha soa persoa. A experto conta con todo un equipo xurídico formado por outros letrados no que cada un desempeña a súa función particular. En canto á remuneración, Galindo non compatibiliza ningún tipo de pensión co seu salario habitual como funcionario, polo que, do mesmo xeito que a súa xornada laboral, a retribución que recibe non dista da que obtiña antes de alcanzar a idade oficial de xubilación.
Mentres a saúde llo permita, confía en seguir formando parte do equipo xurídico da Deputación
SEGUIRÁ EN ACTIVO. Polo momento, a opción de retirarse non entra dentro dos seus plans a curto prazo. Mentres o cansazo ou a saúde non llo impidan, a súa intención é seguir formando parte do equipo que conforma o gabinete xurídico da Deputación.
Doutra banda, a pesar de descartar polo momento a idea de retirarse, tamén admite que "a medida que pasa o tempo, un busca cada vez máis a vida cómoda e relaxante" que outorga a ausencia de responsabilidades laborais. "Hoxe véxome capaz de seguir facendo o meu traballo, pero nunca se sabe o que virá mañá", engade.
EXPERIENCIA. Deixando a un lado a súa traxectoria profesional, Galindo González realiza unha reflexión xeral sobre o que supón para el a idade de xubilación legal, fixada este ano nos 65 anos e oito meses para quen cotice menos de 36 anos e 9 meses. Para o letrado, o momento da retirada débeo marcar o propio corpo. "Ás veces, é un erro deixar ir a profesionais con experiencia que poden seguir traballando e queren facelo", afirma.
Neste sentido, matiza que unha vez cumpridos os 65 anos —tendo en conta sempre as diferentes condicións segundo o tipo de tarefa que se realice—, moitos traballadores aínda se atopan en plenas facultades para continuar desempeñando a súa xornada laboral.
Precisamente, esa experiencia adquirida cos anos, segundo mantén Galindo, é a que os fixo grandes profesionais capaces de achegar coñecementos útiles que sirvan de guía ás novas xeracións.
