O Xulgado do Mercantil número 3 de Pontevedra, con sede en Vigo, aceptou venda do estaleiro Factorías Vulcano, que se atopa en liquidación, xunto coa concesión administrativa á empresa Mariña Meridional, propiedade de José Alberto Barreiras e as súas fillas.
Na resolución, contra a que cabe recurso de reposición, o maxistrado aceptou a que foi a única oferta presentada e que se elevou a 7,85 millóns de euros. Así, requiriu á sociedade que compareza o día 22 de setembro de 2020 ás 12.00 horas nunha notaría de Vigo para "formalizar a escritura de venda e realizar o pago do prezo estipulado".
O xuíz advertiu que de non presentarse nesta notaría na data sinalada "suporá ter por desistida á sociedade ofertante con perda do depósito constituído". Así mesmo, o maxistrado recordou que o pasado 20 de novembro de 2019 ditouse un auto que aprobou o plan de liquidación do estaleiro vigués.
Tamén sinalou que o pasado 6 de maio a Audiencia Provincial de Pontevedra ditou un auto polo que desestimou a apelación interposta pola Avogacía do Estado, en representación do Porto de Vigo, que entendía que a concesión administrativa debía excluírse da venda ao considerar que se atopaba extinguida debido á liquidación do estaleiro. Deste xeito, a resolución xudicial considerou que se debía manter "a vixencia da concesión administrativa" e que esta formaba parte da unidade produtiva a efectos da súa venda.
Posteriormente, o 6 de xullo, Mariña Meridional presentou a única oferta para a compra de Vulcano. Así, o xuíz apuntou que o informe da administración concursal considerou válida esta proposta, "ao cumprir os requisitos establecidos no plan de liquidación", polo que a aceptou.
OFERTA. En concreto, Mariña Meridional aspira a crear un Holding Naval orientado á construción, a reparación, o mantemento e o acondicionamento de buques nas instalacións de Teis cuxa viabilidade foi defendida por José Alberto Barreiras. Para iso, busca constituír unha nova empresa, previsiblemente denominada Estaleiros Meridional de Vigo.
Aínda que o auto emitido polo Xulgado do Mercantil número 3 de Pontevedra sinala que o próximo 22 de setembro deberase realizar o pago, Barreiras apuntou hai dúas semanas que buscaba evitar asumir de modo inmediato o abono da totalidade do custo e atrasalo ata a próxima primavera. No entanto, o empresario vigués si se mostrou disposto a abonar gastos do estaleiro, como os relativos á administración concursal, desde setembro, a condición de que se mantivese a concesión, polo menos, ata 2027.
Precisamente, o Porto de Vigo solicitara que se mantivese "en suspenso calquera actividade de execución do plan de liquidación sobre a concesión" mentres o Consello de Estado non se pronunciase sobre a mesma. Finalmente, este órgano emitiu un ditame no que, a diferenza da Audiencia Provincial, considerou extinguida a concesión.
REUNIÓN DO CONSELLO DO PORTO. A este respecto, a CIG, CC.OO. e UXT insistiron en que os ditames do Consello de Estado non son vinculantes e remarcaron a necesidade de que non se extinguise a concesión para facilitar o mantemento da actividade industrial nos terreos.
Así as cousas, o consello de administración do Porto de Vigo abordará a situación das instalacións de Teis na súa reunión deste venres. Pola súa banda, Asime asegurou que se poría en contacto cos distintos membros do consello para solicitarlles que se opuxesen á recuperación dos terreos por parte da Autoridade Portuaria e a CIG xa avanzou que se pronunciará nesta liña na sesión.
Preguntado polos medios, o alcalde, Abel Caballero, que forma parte do consello, afirmou que vía "conveniente" o mantemento da actividade industrial, mentres o delegado do Estado na Zona Franca, David Regades, que tamén integra o órgano do Porto, destacou que esta institución se porá a disposición de calquera proxecto".
