O ministro de Asuntos Exteriores, José Borrell, asegurou este mércores que non se pode prohibir" que Cataluña teña embaixadas no exterior aínda que "haberá que ver cales son as súas actividades".
Nunha entrevista na cadea Cope, Borrell, que se referiu así á decisión da Generalitat de reabrir as embaixadas catalás, recordou que o Tribunal Supremo ditaminou que as comunidades poden ter servizos de representación exterior.
Preguntado polas críticas á súa elección como ministro de Exteriores por parte de dirixentes soberanistas, Borrell dixo que non vai entrar nunha escalada de descualificacións e engadiu que descoñece por que lle chaman "ultra" pero non pensa "responder con insultos senón con feitos".
Tamén comentou que non quere converterse no ministro dos "asuntos cataláns" e insistiu en que traballará para defender a imaxe de España, "que quedou moi danada, verteuse moita insidia e moita mentira".
