As Forzas e Corpos de Seguridade do Estado buscan unha vintena de encapuchados que asaltaron o servizo de urxencias do Hospital de La Línea de la Concepción (Cádiz) para liberar o líder dunha rede de narcotráfico, que fora levado alí ferido e detido.
O suceso ocorreu pouco antes das 16.00 horas deste martes, cando unha patrulla da Policía Nacional que formaba parte dun control ordinario deu o alto a unha motocicleta na que circulaba unha parella. Ao ver o sinal, a muller baixouse da moto "para facilitar" que o condutor, un coñecido narcotraficante da zona identificado como Samuel C., emprendese a fuxida.
O condutor chocou ao pouco nunha rotonda da estrada do Zabal e caeu ao chan, o que lle provocou feridas abertas nunha perna e na cara. Os axentes comprobaron que tiña dúas ordes pendentes de ingreso en prisión por delitos relacionados co tráfico de drogas, detivérono e leváronoao servizo de urxencias do Hospital de La Línea.
A Policía sospeita que a muller que ía con el na moto alertou aos membros da súa banda do sucedido e estes decidiron ir ao rescate do seu "xefe". Reaccionaron con tanta rapidez que os investigadores cren que xa estaban xuntos esperando o desembarco dalgún alixo.
Así unha vintena de encapuchados presentouse no hospital, dando berros e tirando algún obxecto, e, tras un violento enfrontamento cos dous axentes, levaron o detido esposado nunha das dúas furgonetas coas que acudiran ao centro sanitario. Os axentes só puideron deter a un dos encapuchados.
O violento incidente "é unha mostra máis da impunidade que hai instalada entre as redes de narcotráfico asentadas no Campo de Xibraltar e que vimos denunciado desde hai moito tempo", dixo Francisco Mena, presidente da Federación Provincial Antidrogas Nexos.
Como tamén outros sindicatos policiais, reclamou que os reforzos que levan á zona para loitar contra o narcotráfico sexan "permanentes" e non "puntuais", como os que levaron o ano pasado e que "aos tres meses desapareceron".
O ministro de Interior, Juan Ignacio Zoido, confiou en que a Policía Nacional deterá pronto aos encapuchados que cometeron o asalto e ao narcotraficante fuxido.
PSOE, EU, e Ciudadanos anunciaron este mércores que solicitarán explicacións sobre estes incidentes ao ministro do Interior no Congreso.
A presidenta andaluza, Susana Díaz, dixo este mércores que non sabe xa "como dicirlle" ao Goberno que é "urxente e moi necesaria" unha maior presenza dos corpos de seguridade no Campo de Xibraltar, porque "a situación de inseguridade que se está vivindo non é de recibo".
O alcalde de La Línea, Juan Franco, destacou o "gran traballo" que as Forzas e Corpos de Seguridade do Estado fan na zona. Pero subliñou que "por desgraza non é suficiente" porque "o inimigo para abater é moi forte, é unha serpe de sete cabezas: por máis que cortes unha, seguen saíndo".
