Os examinadores de tráfico desconvocaron a folga que o colectivo comezara este luns e que tiña previsto alargar, de momento, ata o 21 de decembro, segundo informa a Asociación de Examinadores de Tráfico (Asextra), convocante dos paros. O Comité de Folga mantivo este luns ás 17.00 horas unha reunión coa DXT para desbloquear a situación. Segundo indica Asextra, esta desconvocatoria prodúcese "por un acto de boa fe, unha vez máis, do colectivo examinador, en aras de dar un bo servizo ao cidadán".
O colectivo púxose en folga para denunciar que o incremento retributivo que pedían —duns 250 euros ao mes a distribuír en 14 pagas, o denominado 'complemento específico'— non está aínda reflectido nas súas nóminas, cando esta demanda foi aprobada nos Orzamentos Xerais do Estado de 2018, logo da presión da oposición e tras case seis meses de folga durante 2017, unha das máis longas da democracia española.
Nesta primeira xornada de paros, o seguimento foi de entre o 82%, segundo datos de DXT, e o 90% segundo CSIF
Con todo, un ano despois, a asociación lamenta que aínda non se executou este incremento retributivo ao colectivo por parte do órgano competente, a Comisión Executiva da Comisión Interministerial de Retribucións (CECIR). Segundo comentou este luns pola mañá o presidente da asociación, Joaquín Jiménez, durante a manifestación que o colectivo convocou en Madrid, este incremento retributivo non se executou aínda porque o anterior Goberno do PP non introduciu unha disposición transitoria na Lei de Orzamentos que eximise do cumprimento obrigatorio que teñen todos os funcionarios de que o seu tope salarial non supere o 1,5% en 2018.
Segundo indica CSIF, o acordo ao que se chegou e que motivou a desconvocatoria dos paros é o abono, por parte do director xeral de Custos de Persoal e Pensións Públicas, dunha partida orzamentaria, que se recolle nos PGE de 2018, en concepto de produtividade especial, ante a imposibilidade de executalo como complemento específico durante o exercicio 2018. E para 2019, a adición dunha disposición adicional á Lei de Orzamentos Xerais do Estado para 2019, que permitirá aplicar o incremento do complemento específico e liquidar o problema legal ocorrido en 2018.
A DXT cifrou nunhas 5.000 as probas prácticas de conducir suspendidas este luns polos paros
Por parte da DXT, CSIF apunta que se abonará neste mes de decembro o importe correspondente á contía estipulada nos PGE 2018, mediante un único pago en nómina de incidencias e baixo o concepto de produtividade especial. Esta produtividade será percibida por todos os examinadores e examinadores coordinadores nas mesmas condicións que se percibe o complemento específico con carácter retroactivo desde o 1 de xaneiro de 2018.
CSIF tamén asegura que se creará unha comisión de seguimento para o estudo e consecución da aplicación do incremento do complemento específico do colectivo examinador e examinador coordinador que estará formada por persoal "da Dirección Xeral de Tráfico con capacidade de decisión e catro membros de Asextra". A primeira reunión desta Comisión terá lugar a terceira semana de xaneiro de 2019. Estas reunións manteranse unha vez ao mes ata que se consiga a efectividade do incremento do complemento específico.
En 2017 os paros provocaron a suspensión de máis de 220.000 exames de conducir e perdas millonarias para as autoescolas
Pese ao acordo, Asextra insiste en que estas medidas son "unha solución transitoria ata a consecución da modificación da Relación de Postos de Traballo (RPT) co incremento retributivo correspondente do complemento específico". O Comité agradece e recoñece o "esforzo e traballo" do director xeral de Tráfico, Pere Navarro, en favor do que el tamén considera que é xusto, segundo a asociación.
En calquera caso, advírtenlle de que se no primeiro semestre do ano 2019 non se modifica a RPT coa súa reivindicación, "o colectivo examinador iniciará novamente o conflito laboral" e "de forma indefinida".