Òmnium Cultural esixiu este sábado aos partidos soberanistas "máxima unidade e xenerosidade" para garantir "canto antes" unha investidura e uns obxectivos "mínimos amplamente compartidos", á vez que lles reclamou que desvelen as súas estratexias e fagan "autocrítica".
O vicepresidente da entidade soberanista, Marcel Mauri, leu este sábado un manifesto acompañado da xunta directiva da organización, coa ausencia do presidente, Jordi Cuixart, que segue en prisión.
"EPISODIOS DESCONCERTANTES". Para Òmnium, as "diversas estratexias políticas diferenciadas" no soberanismo provocan "episodios desconcertantes" como o vivido o pasado martes co adiamento da investidura, o que provocou discrepancias entre JxCat, ERC e CUP.
Neste contexto, Mauri pediu aos partidos soberanistas "máxima unidade e xenerosidade para poder garantir canto antes a investidura, a formación do Govern e a restitución" das institucións catalás.
PUIGDEMONT. O manifesto non inclúe o nome do líder de JxCat e candidato á Presidencia da Generalitat, Carles Puigdemont, que rexeitou regresar de Bélxica para a investidura.
En todo caso, Mauri especificou que a demanda de xenerosidade é "para todos os partidos soberanistas" e que a Òmnium "non lle corresponde" valorar a posibilidade de nomes alternativos á Presidencia da Generalitat, e neste sentido remarcou que o candidato é "Carles Puigdemont porque así o decidiu a maioría do Parlament e así o dixo o presidente" da Cámara, Roger Torrent.
O manifesto reclama ás forzas soberanistas que "asuman a responsabilidade que lles deu as urnas", e que "falen claro á cidadanía e expliquen coa máxima transparencia cales son as estratexias que cada un cre que debe seguir a partir de agora".
"REPRESIÓN". A entidade soberanista entende que no actual "contexto político complexo e de represión, as respostas políticas tamén teñen que ser complexas, e que non hai solucións rápidas nin fáciles".
Pero "a partir das lexítimas estratexias de cada partido", Òmnium pediu que "se traballe desde o soberanismo para fixar uns obxectivos mínimos de país que sexan amplamente compartidos e que permitan sumar máis persoas ao proxecto republicano e avanzar cara á súa materialización".
Para a organización, o camiño é "longo" pero "será irreversible se así o decide a cidadanía", polo que apela a seguir sen "deixarse asustar pola forza dun Estado que utiliza todos os mecanismos para silenciar" ao soberanismo.
"Fagamos un exercicio de autocrítica e sinceridade connosco mesmos", engadiu Mauri, que remarcou que "son necesarias solucións serenas, firmes e o máis amplamente compartidas que respecten os resultados expresados pola cidadanía o 21-D".
A entidade incidiu na necesidade de acabar co artigo 155 da Constitución, porque pon "en risco" as competencias e "grandes consensos de país", e alertou da "crecente presenza de formacións cun discurso populista", nunha crítica velada a Cidadáns.
