Juan Carlos Quer solicitou este luns 5 de marzo, en nome da Plataforma Non á Derrogación da Prisión permanente revisable, que agrupa tamén aos familiares de Marta del Castillo, Mari Luz Cortés, Candela e Amaia Oubel Viéitez ou Ruth e José Bretón Ortiz, unha reunión cos grupos parlamentarios para pedirlles persoalmente que non derroguen este tipo de pena do Código Penal.
Quer e os pais e nais destes nenos queren explicar aos deputados os detalles da súa campaña contra a derrogación da prisión permanente, lanzada hai mes e medio en Change.org, e que conta con máis de 2,3 millóns de firmas. Esta petición dáse no contexto do debate sobre a derrogación desta pena previsto para as próximas semanas no Congreso dos Deputados.
Na carta, que a plataforma enviou este luns aos portavoces parlamentarios dos diferentes grupos políticos, solicítase esta reunión ao entender que a protección dos seus fillos e fillas "é unha prioridade para os cidadáns, e é tamén unha responsabilidade que recae nos partidos políticos".
Os familiares apelan a este "clamor social que crece día a día" coas adhesións á súa campaña e que, segundo lembran, é reflectido igualmente nas enquisas, que sinalan que "oito de cada 10 cidadáns están a favor de que se manteña esta pena no Código Penal".
"Neste contexto, e en nome deses máis de dous millóns de cidadáns que nos apoian, gustaríanos poder exporlle a cada portavoz nunha carta en persoa en que consiste a nosa campaña, que insistimos non ten ningunha adscrición política ou partidista", sinala Quer nas cartas dirixidas a cada un dos portavoces parlamentarios.
A esta campaña sumouse recentemente, de maneira activa, a Asociación Clara Campoamor, "unha das organizacións feministas e progresistas con máis experiencia na defensa dos dereitos da muller e dos menores", segundo indica neste comunicado.
