O Ministerio de Traballo, Migracións e Seguridade Social vai elevar as sancións previstas para os casos en que se detecten "falsos autónomos" que deberían estar empregados pola empresa, xa que se converterá nunha infracción grave suxeita a unha multa que oscilará de 3.126 a 10.000 euros por traballador.
Confirmouno en rolda de prensa a ministra de Traballo, Magdalena Valerio, tras a ratificación do acordo coas organizacións de autónomos sobre bases e cotizacións, que previsiblemente se aprobará este venres no Consello de Ministros dentro dun decreto lei en materia de Seguridade Social, que leva como principal medida a revalorización das pensións para 2019.
A ministra recordou que en virtude deste acordo a base mínima de cotización do réxime de autónomos quedará desde o 1 de xaneiro de 2019 por baixo da establecida para o réxime xeral dos asalariados.
Para evitar que ante esta situación "alguén teña a tentación" de transvasar empregados do réxime xeral ao réxime de autónomos, optouse por elevar as sancións por esta práctica fraudulenta, explicou Valerio.
Para iso, o decreto lei que previsiblemente se aprobará este venres contemplará unha modificación do artigo 22 da Lei de Infraccións e Sancións na orde social para que a figura do "falso autónomo" sexa considerada como unha falta grave sancionable por cada un dos traballadores detectados nesa situación.
