O colectivo de xubilados e pensionistas do sindicato CIG reclamou este mércores na Coruña a subida das pensións de, polo menos, o IPC, que se situou o ano pasado nunha 1,7% fronte ao 0,25% que crecen os cobros, tras unha perda de poder adquisitivo que calculan nun 20% na última década.
Tras a pancarta Na defensa dos nosos dereitos, máis dun centenar de persoas concentráronse ante a Delegación do Goberno en Galicia.
Encabezados polo secretario xeral da CIG, Paulo Carril, o colectivo de xubilados e pensionistas clamou contra a situación que viven na actualidade, nunha protesta que se estendeu ao resto de Galicia con outras concentracións que acumularon centenares de persoas, segundo o sindicato.
O responsable comarcal do colectivo de xubilados e pensionistas da CIG, Eduardo Álvarez González, explicou, en declaracións a Efe, que o obxectivo destas mobilizacións é "protestar contra a perda do poder adquisitivo" que experimentan "ano tras ano" os pensionistas. "O ano pasado subiu un 1,7% o IPC en Galicia, pero as pensións só soben un 0,25%. Non só as pensións teñen menos valor con respecto ao que custa a vida, senón que se engaden outros gastos que non existían, como a parte das medicinas que temos que pagar ou as moitas que foron excluídas da asistencia sanitaria".
Cunha pensión media en Galicia de 783,72 euros, a segunda máis baixa de España, a subida do 0,25% supón apenas 1,96 euros, unha cantidade que ao colectivo lle parece exigua.
"Incrementáronse os gastos de consumo e enerxía, aumentaron os impostos. As pensións cada vez teñen menos poder adquisitivo. Calculamos que un vinte por cento menos na última década", abundou.
O que piden é que "as pensións se incrementen conforme incrementa a vida, o IPC", o que sucedía ata 2012, pero desde entón "conxelouse no 0,25%, que en realidade é unha perda", conclúen.
A CIG reclama unha subida das pensións de, polo menos, o IPC
Máis dun centenar se persoas concentráronse ante a Delegación do Goberno na Coruña
