O secretario de Organización do PSOE, José Luis Ábalos, asegurou este luns que "aínda hai tempo para buscar un acordo" no PSdeG, tras anunciar o portavoz do PSOE ourensán, José Ángel Vázquez Barquero, que renuncia a ser candidato nas municipais por discrepancias na composición da lista.
Segundo apuntou Ábalos en rolda de prensa, a Comisión Federal de Listas aínda pode facer "axustes" nas candidaturas municipais, ata que teñan que remitirse á Xunta Electoral en abril.
Á renuncia do candidato de Ourense poderían sumarse outras, tras a intervención de Ferraz nalgunhas listas de Galicia co fin de incorporar nomes promovidos pola dirección rexional de Gonzalo Caballero.
