A VG 4.3, que une Vilagarcía de Arousa con Cambados, permaneceu cortada ao tráfico durante a última hora da tarde deste mércores ao rexistrarse na mesma dous accidentes múltiples.
O primeiro sinistro consistiu nun choque frontal entre unha furgoneta e un turismo, probablemente a causa do mal tempo e a intensa choiva.
Os dous condutores resultaron feridos graves e foron trasladados ao Hospital do Salnés por sendas ambulancias do 061.
Pouco despois rexistrouse un segundo accidente, neste caso, unha colisión por alcance con tres vehículos implicados pero sen maiores consecuencias.
A Garda Civil tivo que desviar o tráfico por diferentes viarios alternativos, mentres que os servizos de urxencias, Bombeiros do Salnés e Protección Civil de Vilagarcía procederon á retirada dos turismos implicados e á limpeza dos restos esparexidos pola estrada.
