Un veciño de Taboada acusado de distribución de pornografía infantil aceptou dous anos de prisión despois de que as partes alcanzasen un acordo antes do xuízo fixado para este xoves na Audiencia Provincial. Os feitos polos que ía ser xulgado remóntanse a 2013, cando a Garda Civil iniciou unha investigación a instancias da embaixada de Estados Unidos onde se constata que se detectou a un grupo de persoas que compartían arquivos pedofilos a través de Facebook.
Dentro dese grupo de persoas, máis dun centenar, atopábase este veciño de Taboada, para o que a Fiscalía pedía inicialmente 10 anos de prisión. O home estaba acusado dun delito continuado de corrupción de menores na súa modalidade de difusión de pornografía infantil con menores de trece anos e outro na súa modalidade de posesión de material pedófilo para o seu propio uso. Polo primeiro, a acusación pública requiría nove anos de prisión e polo segundo, un ano.
Tívose en conta "a colaboración do propio acusado no esclarecemento dos feitos investigados, e a dilación indebida de seis anos practicamente"
O avogado do procesado, José Luís Gutiérrez Aranguren, confirmou que o acordo supón "dous anos de prisión e unha multa de 900 euros". Seguidamente precisou que se retirou a parte que facía referencia á idade das menores, dado que non hai evidencias que fosen menores de trece anos".
Así mesmo, tívose en conta "a colaboración do propio acusado no esclarecemento dos feitos investigados, e a dilación indebida de seis anos practicamente".
O condenado a dous anos de prisión non terá que entrar no cárcere. O seu avogado concretou que tiña "o compromiso da Fiscalía de que non vai haber oposición á suspensión da condena".
Os investigadores comprobaron que o acusado compartiu polo menos tres vídeos de menores practicando sexo con adultos
OS FEITOS. Segundo o escrito de acusación do ministerio público, os feitos sucederon entre novembro de 2013 e xuño de 2014, cando o acusado supostamente compartiu pornografía infantil a través das redes sociais, para o que fixo uso da súa propia tarifa de datos, pero tamén das conexións da autoescola na que estaba a realizar un curso e da wifi de dous establecementos de hostalería de Taboada. Os investigadores comprobaron que o acusado compartiu polo menos tres vídeos de menores practicando sexo con adultos, a través dun perfil de Facebook, do WhatsApp e do Twitter.
Posteriormente, o 9 de xuño de 2014, produciuse un rexistro no domicilio do sospeitoso no que a Garda Civil interveu cinco teléfonos móbiles, un disco duro externo, un CD e unha caixa de disquetes. Neses dispositivos de almacenamento, os investigadores atoparon uns oitocentos arquivos de pornografía infantil.
