O corpo sen vida de Ramiro Vega, veciño de San Sadurniño (A Coruña) en paradoiro descoñecido desde o pasado domingo, foi atopado na tarde deste mércores no lugar do Cando, nese mesmo municipio, informaron a Efe fontes municipais.
O goberno local remarcou o seu "agradecemento a todas as persoas que se envorcaron durante os últimos días" para intentar atopar ao home, de 81 anos e residente na parroquia de Igrexafeita.
As tarefas retomáronse á primeira hora da tarde, concentrándose os esforzos na zona de Espiñaredo e nas pistas e a estrada vella que rodean o lago do veciño concello das Pontes. Así mesmo, mantívose un retén pola Casatellada, A Ribeira e A Fervenza.
Previamente, durante a franxa matinal, rastrexouse o núcleo dos Tembrás coa cadela do desaparecido e seguindo a pista que revestía "maior fiabilidade", dixeron as mesmas fontes. O persoal especializado traballou "só co animal para evitar rastros falsos".
A actividade vespertina centrouse nun primeiro momento na zona de bosque entre Os Tembrás, O Castro e A Pena da Meda, partindo da igrexa da Toca, na localidade limítrofe das Somozas.
O Concello de San Sadurniño subliñou que a mañá serviu tamén para revisar a pé, en coche e dacabalo A Casatellada, o monte ata Os Carboados, parte do Forgoselo, o carreiro do río Castro ata o castelo de Naraío, e incluso pistas xa no concello das Pontes.
Na cuarta xornada de procura, as patrullas dispostas ao efecto, formadas por preto dun centenar de veciños, estendéronse a municipios próximos. Deste xeito, aumentouse o radio de acción con respecto a xornadas anteriores.
