A patrulla do Seprona da compañía de Santiago abriu unha investigación sobre un veciño de Melide por un suposto delito contra animais domésticos en relación á morte de sete cabalos. As pescudas iniciáronse a raíz de que a Garda Civil observase "diversas irregularidades" en materia de sanidade animal, que tamén foran apreciadas en anteriores ocasións e no mesmo lugar.
Atendendo á información divulgada polo instituto armado, púidose comprobar a existencia de 29 equinos nas instalacións, sete deles mortos. "Todos os cabalos mostraban signos de malnutrición, mala hixiene e falta de coidados imprescindibles para a súa existencia", asegura.
Dous dos animais falecidos atopábanse en cuadras individuais e contiguas, "nas que se puideron apreciar signos evidentes da agonía sufrida e as tentativas de escapar dos habitáculos onde se atopaban amontoados", sinala a Benemérita.
Por iso, requiriuse a colaboración dos servizos veterinarios da Consellería do Medio Rural para a inspección das instalacións e a valoración do estado dos animais, polo que se procedeu a adoptar medidas para preservar a vida dos animais.
Os feitos foron postos en coñecemento do xulgado de Arzúa. Segundo o instituto armado, o presunto autor dos feitos "é multirreincidente en delitos de malos tratos animais".
Na mesma parcela, o pasado mes de maio, realizouse outra intervención coa que se atoparon os corpos de seis cabalos e dous cans. Algúns presentaban un avanzado estado de descomposición. Tamén se procedeu a outra intervención policial similar no ano 2012.