O home acusado de asasinar a un mozo de 25 anos na noite de San Xoán de 2017 na praia de Arealonga, en Chapela, manifestou, facendo uso do dereito á última palabra, que se arrepentirá "toda a vida" por non "quedar na casa esa mala noite".
Á conclusión do xuízo na Audiencia de Pontevedra, pendente agora do veredicto do xurado popular, José Luís L.P. leu unha carta manuscrita na que expresou o seu pésame á familia e amigos de Daniel Beltrán e dixo que cambiaría a súa vida pola da vítima "sen pensalo".
Tamén manifestou que é "moi consciente" de que os seus actos "esnaquizaron a dúas familias", a da vítima mortal e a súa, e engadiu: "non teño perdón ningún".
José Luís L.P. indicou que aos seus 46 anos sabe que a condena que lle poida caer vai ser a súa "morte en vida", e que se considera "incapaz de facer dano a ninguén".
Relatou que desde neno a súa vida foi "un tormento" e que non ten recordos "en liberdade", pois desde os 19 anos sucedéronse as súas entradas e saídas do cárcere e atopou "un escape" nas drogas. "Síntoo. Gustaríame que todo fose distinto", concluíu a súa alegación.
Tras estas palabras, o xuízo quedou visto para sentenza, a expensas do veredicto do xurado, que comezará a elaborar a partir do xoves.
O representante do ministerio público modificou o seu escrito de acusación ao introducir a alternativa dun delito de atentado contra axentes da autoridade ao de homicidio en grao de tentativa, que considera en todo caso probado tras a proba practicada na vista oral.
Así pois, dos 10 anos que solicita para o acusado por supostamente intentar coller o revólver e dispararlle aos axentes que o acabaron reducindo, propón como alternativa o delito de atentado contra axentes da autoridade co uso de armas, tamén en grao de tentativa, penado con tres anos de prisión.
Mentres, a avogada da defensa ratificouse en pedir a libre absolución do seu cliente e, en caso contrario, que as circunstancias eximentes alegadas, as de intoxicación plena e de alteración psíquica, pasen a ser consideradas como atenuantes á hora de fixar as penas polos catro delitos que lle imputan.
Estes son, no caso da Fiscalía, dous delitos de asasinato, un en grao de tentativa, outro de tentativa de homicidio ou, alternativamente, de atentado contra axente da autoridade, e outro de tenencia ilícita de armas co agravante de reincidencia, ao acumular catro condenas anteriores.
O fiscal dirixiuse ao xurado popular, composto por catro homes e sete mulleres, dous deles suplentes, para advertirlles de que se asumen a tese da defensa, José Luís L.P. podería en cinco anos "saír á rúa e cárgase a outros dous".
