O Administrador de Infraestruturas Ferroviarias (Adif) aprobou a licitación de novos contratos para avanzar na Liña de Alta Velocidade (LAV) de Madrid-Galicia, unhas actuacións que suporán un importe global de máis de 150 millóns de euros.
Os contratos céntranse no tramo comprendido entre Pedralba de la Pradería (Zamora) e Ourense e teñen o obxectivo de culminar a conexión de alta velocidade entre a Comunidade galega e a capital española, segundo sinalou nun comunicado a compañía pública.
Por unha banda, licitouse dous contratos de 91,34 millóns de euros en conxunto sobre as instalacións de protección e seguridade en 19 túneles. Ambos inclúen o mantemento das instalacións durante uns tres anos.
Con estas actuacións, dotarase aos túneles de sinalización de evacuación, iluminación de urxencia, ventilación en saídas de urxencia, sistemas de radiocomunicación para medios de intervención, equipos de detección e extinción de incendios.
Un dos contratos está centrado no tramo entre Pedralba e Vilariño, no que se inclúen os sete túneles da provincia de Zamora —Pedralba, Requejo, Padornelo, Avesedimas, Hedroso, Lubián e A Canda— e tres da provincia de Ourense —Vilavella, O Cañizo e Espiño—.
O outro contrato é relativo ao tramo entre Vilariño e Taboadela, no que se inclúen nove túneles da provincia de Ourense —Bolaños, Portocamba, Cerdedelo, O Corno, Corga da Vela, Prado, Seiró, Bouzas e Os Casares—.
ELECTRIFICACIÓN E CENTROS DE AUTOTRANSFORMACIÓN. Ao mesmo tempo, a compañía pública promotora e xestora da rede ferroviaria ha licitado a instalación do sistema de electrificación (catenaria) deste tramo de AVE (Pedralba-Taboadela-Ourense), unha obra estimada en 44,45 millóns e que levará dous anos.
Así mesmo, lanzou a concurso público a construción, nun prazo de 9 meses, e posterior mantemento, durante 24 meses, dos correspondentes centros de autotransformación do tramo. Trátase dos equipos para a xestión da subministración de enerxía eléctrica á liña AVE, ademais do telemando —control remoto— de enerxía deste trazado do corredor galego, por 14,66 millóns de euros máis.
