O alcalde do municipio coruñés de Sada, Benito Portela, remitiu este mércores unha carta ao presidente do Goberno, Pedro Sánchez, na que lle solicita que o Pazo de Meirás se inclúa na modificación da Lei de Memoria Histórica.
En liña coa petición feita pública este mércores a través dun comunicado, o alcalde de Sada, Benito Portela, reclama que esta modificación, a través dun decreto lei, "debe amparar a retirada dos restos de Franco do Val dos Caídos, pero tamén a retirada dos seus herdeiros do Pazo de Meirás".
Así mesmo, pide que o Goberno ordene á Avogacía do Estado a interposición de demanda xudicial civil ante o Xulgado de Betanzos, "tal e como acordou unanimemente o Parlamento de Galicia en sesión celebrada o pasado 11 de xullo".
SEGUNDA CARTA A SÁNCHEZ. Esta é a segunda carta –a primeira foi o pasado 19 de xuño– que o alcalde de Sada remite ao presidente do Goberno en relación á situación do Pazo de Meirás.
Con iso, espera que o Goberno sexa "receptivo" ás súas demandas, sinala nun comunicado. "Unhas demandas que estou seguro que, no trámite parlamentario correspondente, serán compartidas e defendidas nas Cortes do Estado polas forzas políticas democráticas".
Ademais, na súa misiva, afirma que o Concello de Sada "seguirá pelexando co obxectivo de conseguir que o Pazo pase a ser de titularidade e usos públicos coa debida reparación e recoñecemento ás vítimas da represión".