O alcalde de Sanxenxo, Telmo Martín, cualificou de "tremendamente inxusta" a saída de España do rei Juan Carlos I. Nunha férrea defensa do monarca, o popular defende os "39 anos de reinado" do rei emérito, que define como "os mellores de España". "Dáme igual cales sexan as súas debilidades humanas", abunda.
En Sanxenxo, municipio do que é alcalde Martín, Juan Carlos I pasou as súas últimas horas en España antes de abandonar o país supostamente vía Portugal cara a un paradoiro que segue sendo descoñecido. Na vila pontevedresa, o monarca mantivo unha última cea xunto aos seus compañeiros de regatas e aloxouse na casa do seu inseparable amigo Pedro Campos, director do Real Club Náutico.
Nunha mensaxe difundida este mércores a través da súa conta de Facebook, Telmo Martín asegurou que "Sanxenxo lle debe moito ao rei Juan Carlos I". "As súas frecuentes visitas desde o ano 2000 ata hoxe para navegar e gozar da nosa gastronomía foron a mellor campaña publicitaria que pode ter un destino turístico. El sabe que Sanxenxo sempre será a súa casa e espero que pronto volva estar entre nós. Señor, agora máis que nunca, todo o meu respecto e admiración", engadía o alcalde.
Ademais, o popular deixa entrever que Juan Carlos I foi vítima dunha "cacería mediática". "A día de hoxe, non está imputado e as acusacións mediáticas baséanse nas gravacións dun excomisario encarcerado a unha muller enfadada e investigada por un fiscal suízo", apunta. E desliza que detrás da súa decisión poderían estar "as inxentes presións do goberno de Sánchez e o seu aparello mediático".
