María del Carmen Rubinos, a muller de 47 anos desaparecida en #Baralla, foi localizada ás 10.00 horas da mañá deste xoves nun anexo da vivenda na que reside xunto ao seu marido e tres fillos -dous mozos e unha moza- no lugar de Basille, na parroquia de Santiago de Pousada. A muller atópase en perfecto estado.
Garda Civil e traballadores do GES de Becerreá despregaron na tarde deste mércores un amplo operativo de procura baixo a crenza de que a marcha da muller era voluntaria. Sospeitaban que aproveitara un momento no que se atopaba soa, porque o seu marido saíra a recoller leña, para ausentarse. Naquel momento vestía un pixama e ía en zapatillas.
En canto notaron a súa ausencia, os familiares comezaron a buscala polos arredores da vivenda. Ao non dar con ela denunciaron a súa desaparición ao redor das catro da tarde deste mércores, momento no que se organizou o dispositivo de procura.
Durante toda a tarde, tentaron dar co seu paradoiro buscando nas inmediacións da casa, en alpendres próximos e, mesmo noutras parroquias, como a de Ferreiros, de onde ela é natural. A preocupación polo seu estado a última hora da tarde era máxima, xa que a muller non ía preparada para soportar as baixas temperaturas da noite e, ao parecer, tamén estaba a pasar por unha depresión.
