Ana Pontón reivindica a unidade para conseguir unha Galicia "feminista"

A candidata do BNG á presidencia da Xunta de Galicia tamén agradeceu ao conxunto do pobo galego o seu comportamento "exemplar"
Ana Pontón, en Ferrol. EFE
photo_camera Ana Pontón, en Ferrol. EFE

Ana Pontón destacou o papel das mulleres na sociedade galega, nun acto electoral realizado este domingo, no que agradeceu o seu labor "ás sanitarias, policías e mestras" nestes meses de crises pola Covid-19, con mulleres traballando en condicións "precarias", polo que un dos obxectivos nas eleccións galegas é "facer unha Galicia feminista". 

A candidata do BNG á presidencia da Xunta de Galicia tamén agradeceu ao conxunto do pobo galego o seu comportamento "exemplar", que é "exclusivo do pobo e non de ningún partido". Ademais, criticou ao presidente da Xunta e candidato do PP, Alberto Núñez Feijóo, quen considera que "non estivo á altura, colgándose as medallas dos galegos". 

Nesta liña tamén recriminou as formas "porque non comparecía no Parlamento galego e si nos medios públicos". Tras o fin do estado de alarma "agora ten as competencias" pero "non dá a cara" co brote da Mariña, no que "manda ao conselleiro, el escapa". 

O PP está actualmente "improvisando", dixo, e isto foi algo "que lle recriminaba ao goberno central" nun acto público que finalizara minutos antes de que a Consellería de Sanidade declarase o peche durante cinco días do distrito sanitario da Mariña. 

Pontón censurou o "turismo electoral", coa presenza de políticos procedentes de Madrid

Neste acto público en Ferrol, Ana Pontón tamén fixo referencia á situación da industria naval e preguntou aos asistentes: "¿Cal será o Pemex desta campaña?". "Os barcos non están e a xente seguen na cola do paro", reprochou. 

A candidata tamén se referiu ao mitin do PP deste sábado nas Pontes, no que "non achegaron solucións". Pontón declarou que soña cun Ferrol "cos estaleiros cheos, cortando chapa e cunha transición ecolóxica xusta". Ademais, mostrou o seu enfado coas empresas "que collen o diñeiro público antes de marchar". 

Pontón censurou o "turismo electoral", coa presenza de políticos procedentes de Madrid para arroupar aos candidatos galegos das diversas formacións políticas. 

Ao seu xuízo, isto debeuse "a que ven mal", polo que o obxectivo do BNG nas eleccións galegas é "mandar a Feijóo a Madrid e en Galicia ter un goberno do BNG". 

Pola súa banda, o deputado do BNG no Congreso, Néstor Rego, criticou as estratexias "de vello caciquismo" realizadas polo PP "que agora se apoian nas novas tecnoloxías, ademais de controlar os medios de comunicación", o que fixo que "a imaxe sexa moi afastada do que é a Galicia real". 

Rego tamén se referiu ao PSOE e Unidas Podemos "que están a gobernar en Madrid", pero "non están a conseguir salvar Alcoa, Navantia non pode facer barcos civís e non evitaron o peche de Poligal". 

Comentarios