Angrois: sexto aniversario sen data para o xuízo e con reivindicacións

O vindeiro mércores 24 de xullo cúmprense seis anos do accidente ferroviario que custou a vida de 80 persoas e que deixou a 144 feridos no barrio compostelán de Angrois, ao descarrilar un tren Alvia que circulaba cun exceso de velocidade por un descoido do maquinista nunha liña cunha análise de riscos no seu tramo final cuestionado. 

As responsabilidades penais seguen sen determinarse cando xa pasaron case 2.190 días do sinistro. Pero están apuntadas polo xuíz no seu auto de peche da instrución —que foi recorrido por varias partes acudidas no caso— ao manter imputados o maquinista, Francisco Garzón Amo, e o exdirector de seguridade de Adif Andrés Cortabitarte. 

Así, no ámbito xudicial, a causa está pendente do pronunciamiento da Audiencia Provincial da Coruña sobre eses recursos, que son un total de dez, un de cada unha das defensas dos imputados e oito en representación de vítimas. En concreto, a plataforma de vítimas entende que "tamén existe responsabilidade penal por parte de Renfe", xa que tiña constancia por escrito dun aviso dun xefe de maquinistas sobre o perigo da curva e "non actuou en consecuencia". 

A investigación acumula miles de folios e o instrutor deuna por concluída sinalando as responsabilidades penais do maquinista, que aquel día tomou a curva da Grandeira a máis velocidade da debida tras atender unha chamada telefónica do interventor, e do exresponsable de seguridade de Adif, por unha deficiente análise de riscos na curva. A tese é que, de facer esa avaliación, Adif detectaría o perigo e debería actuar para minimizalo. 

Mentres Garzón foi relegado a tarefas de conservación de trens, Cortabitarte continúa á fronte dun posto de libre designación na entidade pública empresarial que a día de hoxe preside a galega Isabel Pardo de Vera. 

A non ser que os maxistrados da Audiencia ditaminen o contrario (e a expensas de que amplíen ou non as imputacións), Garzón e Cortabitarte sentarán no banco dun xulgado do penal para responder por 80 supostos delitos de homicidio e 144 de lesións por imprudencia profesional grave. De acordo coas previsións do titular do xulgado número 3, haberá que esperar, polo menos, ata o ano 2020 para que chegue ese momento.

ANIVERSARIO. Neste contexto de compás de espera no xudicial e tras o fracaso no político —a comisión de investigación do Congreso dos Deputados terminou sen sequera comezar a redactarse as conclusións debido á disolución das Cortes—, as vítimas do accidente e os seus familiares recordarán o sucedido e volverán reclamar "xustiza e verdade" este mércores 24 de xullo. 

Os afectados centran as súas demandas na investigación independente de carácter técnico que Europa lle instou a realizar a España sen éxito. Esa nova investigación tería que substituír á que levou a cabo a CIAF —comisión adscrita a Fomento—, que só responsabiliza dos feitos ao maquinista. 

Non en balde, de xeito simbólico, as vítimas invitaron aos actos á ata agora comisaria europea de Transportes, Violeta Bulc, quen as recibiu en varias ocasións e mostrou o seu compromiso por que haxa unha investigación independente sobre o sucedido. Sen previsión de que asista, ás 11.00 horas arrincará a marcha desde a estación de tren ata a Praza do Obradoiro, onde un ano máis haberá unha concentración e lectura dun comunicado reivindicativo. 

Pola tarde, ás 18.00 horas celebrarase unha misa na Colexiata de Sar e ás 19.00 horas empezará unha concentración na ponte da curva da Grandeira, que desembocará no inicio dos actos do aniversario, desde as 19.30 horas no campo da festa. 

Un día despois, o xoves 25 de xullo, Día de Galicia, as familias volverán reunirse no denominado xardín do recordo, no Pazo do Faramello, no concello veciño de Rois.