Antón Sánchez pide "reducir o ruído" no caso Paula Quinteiro e apoia abrir un expediente informativo

Ese acordo non ten o respaldo de Villares, que "a título individual" cre que a deputada debe deixar a súa acta

Antón Sánchez, nunha rolda de prensa. LAVANDEIRA JR-EFE
photo_camera Antón Sánchez, nunha rolda de prensa. LAVANDEIRA JR-EFE

O viceportavoz parlamentario de En Marea, Antón Sánchez, instou a "reducir o ruído" no seo do partido instrumental para "actuar con eficacia" na resolución "polos procedementos regulados" do caso de Paula Quinteiro, a deputada que se viu envolvida nun altercado coa Policía Local na madrugada do 18 de marzo e cuxa dimisión reclaman os órganos políticos de En Marea e o seu portavoz, Luís Villares. 

A preguntas dos medios este venres nunha comparecencia de prensa celebrada no Pazo do Hórreo, o tamén portavoz nacional de Anova reiterou o seu apoio á decisión adoptada polo Grupo Parlamentario de abrir un expediente informativo para esclarecer o asunto, xa que cre que se trata da vía adecuada para a resolución dun conflito que abriu unha crise interna na organización rupturista. 
O acordo, ratificado nunha reunión que se alargou durante oito horas, non contou co respaldo do portavoz parlamentario e orgánico da formación rupturista, Luís Villares, que optou pola abstención ese día; mentres que os deputados Paula V. Verao e Davide Rodríguez -este último membro de Anova, do mesmo xeito que Sánchez- rexeitaron a resolución que avalaba a continuidade de Quinteiro, apoiada polos once parlamentarios restantes, na súa maioría membros de Podemos. 
Villares, após case dúas semanas de silencio desde que o asunto transcendiese, expresou publicamente o pasado luns -a "título individual", non como portavoz, dixo- que era partidario de que Paula Quinteiro deixase a súa acta de parlamentaria, en sintonía coa liña que manteñen os órganos políticos de En Marea -Consello e Coordinadora- que encabeza, así mesmo, o propio maxistrado lucense. 

O portavoz orgánico e parlamentario deu unha semana de prazo a Paula Quinteiro para que esclarecese o seu futuro, un ultimato que finaliza esta fin de semana e que podería derivar na convocatoria dunha consulta telemática para preguntar ás bases de En Marea a súa postura sobre a continuidade da deputada no Pazo do Hórreo.
 
Este extremo, avanzado o pasado luns polo propio Villares, xerou malestar no seo do Grupo Parlamentario, cuxa maioría sostén que o asunto debe ser resolto unicamente pola vía do expediente interno. Ademais, certos sectores do partido instrumental aseguran que a revogación dun cargo de representación a través dunha consulta aos inscritos é un procedemento que está sen desenvolver nos regulamentos internos da forza rupturista. 

Antón Sánchez, aínda que sen mencionalo, restou validez a esta hipotética consulta e reiterou que a decisión que debe prevalecer é a acordada no Grupo Parlamentario de En Marea. "É unha guía para a actuación que nos parece razoable e que todo o mundo estará disposto a facer segundo mandan os regulamentos dos que nos dotamos", aseverou.

ACORDO DO GRUPO. "O grupo acordou unha proposta e a ela remítome", repetiu en varias ocasións este venres Antón Sánchez, que cre que a solución ao caso de Quinteiro pasa por aplicar "os procedementos regulados" que ten o partido instrumental e que foron acordados polo grupo parlamentario para, segundo o deputado, "ter unha información veraz" sobre o ocorrido e, á súa vez, para que Quinteiro teña "garantía de defensa". 

"Isto non se resolve con cruces de declaracións nos medios", incidiu, para logo censurar que un asunto "instrumentalizado polo PP e o seu aparello mediático" marcase a "axenda" de En Marea durante "tres semanas". "Debemos ser quen colla o touro polos cornos e utilizar os nosos procedementos regulados para resolvelo, coa verdade e todas as garantías", apostilou.

CONVIVENCIA.  Para Antón Sánchez, En Marea debe responder "fronte á xente" que os converteu en 2016 na primeira forza política da oposición, á vez que indicou que non cre que as tensións no seo do grupo parlamentario (onde conviven os que apoian a Quinteiro e os que, como Villares, apostan pola súa marcha) vaian supor un impedimento para desempeñar o seu labor na Cámara galega. 
"Este grupo está afeito tomar decisións colectivas e isto non debe ser óbice para facer o noso traballo. É máis, debemos centrarnos no noso traballo parlamentario que hai moito que facer", concluíu. 
 

Comentarios