Un novo brote de coronavirus foi detectado este mércores na Mariña con oito casos. Todos con síntomas leves, forman parte da mesma familia. Parte dela compartiu este mes unha comida, que é onde se cre que se produciron a maioría dos contaxios. "Trátase, pois, dun brote familiar de infección por covid-19", explica a Consellería de Sanidade nun comunicado.
O núcleo familiar é de Xove. Xa se iniciou o rastrexo e estanse facendo decenas de PCRs a máis familiares e contactos desas persoas infectadas, que viven en varios concellos mariñáns. "Desde o momento no que o Sergas detectou o primeiro positivo do foco identificado activouse o protocolo de seguimento e realizáronse as probas PCR a todos os contactos estreitos deste positivo", matiza o Sergas.
Ata o momento hai catro negativos e 25 persoas máis pendentes de resultado. Nestes momentos, dos oito casos positivos a maioría son asintomáticos, excepto dúas que presentan sintomatoloxía de carácter leve. Todos teñen o deber de gardar corentena durante 14 días.
Do mesmo xeito, as persoas cuxas probas deron resultado negativo permanecerán en seguimento no seu domicilio, asesorados pola plataforma de vixilancia epidemiolóxica e os servizos de medicina preventiva e saúde pública do Sergas. Ningún afectado tivo que ser hospitalizado.
A Consellería de Sanidade leva rastrexado ata o momento a unhas 40 persoas relacionadas con este brote familiar e séguense investigando posibles contactos. Desde o Sergas lémbrase á cidadanía a necesidade de continuar coas medidas hixiénico-sanitarias establecidas desde o inicio da pandemia do coronavirus, poñendo especial énfase na necesidade de empregar sempre as máscaras, naqueles espazos onde non é posible gardar a distancia de seguridade social.
