O conselleiro de Facenda, Valeriano Martínez, anunciou este mércores que as probas selectivas das oposicións xa convocadas posponse ao último trimestre debido á situación provocada polo coronavirus, unha medida "en liña co que piden os sindicatos". Así o avanzou na súa intervención na Deputación Permanente do Parlamento galego, que comezou cun minuto de silencio de todos os grupos polas vítimas da covid-19.
Con esta medida búscase "pór orde" nos procesos selectivos, despois de que nun primeiro momento xa se fixase unha moratoria de dous meses nestas probas. O obxectivo é retomar estes exames no último trimestre —con excepción de persoal docente e do Sergas— para "achegar certeza e seguridade" aos máis de 45.000 aspirantes.
Na comparecencia a petición propia no Parlamento autonómico, Martínez destacou que, a pesar de que "unha pandemia como esta é imprevisible", a Xunta de Galicia afronta a situación "mellor preparada e coa mellor anticipación que podía ter" grazas " estabilidade política e institucional". Así, defendeu as medidas postas en marcha polo gabinete de Alberto Núñez Feijóo para a "reactivación" económica ante a crise sanitaria, á vez que reclamou ao Goberno central maiores apoios, alegando que as comunidades afrontan esta situación "sen practicamente recursos adicionais".
"Galicia conta cun instrumento fundamental para afrontar unha situación tan complicada, como é o ter un orzamento aprobado en prazo e en vigor desde o 1 de xaneiro, así como o entrar en crise nunha situación económica e financeira máis sólida e solvente que outras comunidades", proseguiu Martínez.
Por outra banda, o conselleiro tamén destacou que Galicia conta cunha "capacidade de gasto do 95,5 %" e un plan de liquidez en tesourería dotado con preto de 1.800 millóns de euros, con 1.300 millóns de fondos propios aos que se suman 260 millóns en préstamos do Banco Europeo de Investimentos (BEI) e outros 200 millóns en préstamos a longo prazo.
"Tamén anunciamos hai semanas o obxectivo de reducir o tempo medio de pago a ao redor de quince días", destacou Martínez, quen engadiu que a suspensión do pago de diferentes impostos autonómicos "beneficia a 32.000 persoas e empresas cada mes" e que se redirixiron 100 millóns doutros capítulos ao gasto sociosanitario.
