O xuízo pola morte de Diana Quer, que debía arrincar este luns en Santiago, foi aprazado ata o próximo 11 de novembro ao non poder constituírse o xurado.
O Tribunal Superior de Xustiza de Galicia indicou que son 21 as persoas as que se presentaron no xulgado. Pero houbo unha renuncia expresa non comunicada antes dunha muller maior de 65 anos de idade, ademais doutras por razóns médicas, mesmo sobrevindas. Tamén houbo recusacións polas partes.
Tras todo iso, foron seleccionados 17 membros, que xa quedaron escollidas, pero a cifra non resulta suficiente para manter os prazos previstos, posto que o mínimo legal esixible é 20, e de aí o aprazamento da vista.
José Enrique Abuín Gey, alias O Chicle, volvía este luns para sentar no banco dos acusados para responder por un dos crimes máis mediáticos dos ocorridos nos últimos anos en Galicia, a desaparición e asasinato da moza madrileña, pola que se enfronta, como autor confeso e único acusado, á pena de prisión permanente revisable.
O proceso ía arrincar nos xulgados de Fontiñas máis de tres anos despois da misteriosa desaparición de Diana, á que se perdeu a pista o 22 de agosto de 2016, cando regresaba á súa casa de veraneo camiñando desde as festas da localidade coruñesa da Pobra. Tiña só 18 anos.
