A Audiencia de Pontevedra arquivou a causa contra o expresidente da Deputación, Rafael Louzán, que estaba investigado por un presunto delito de suborno pasivo polos supostos sobrecustos cobrados nos alugueres de tres baixos comerciais en Vigo.
Do arquivo deste procedemento tamén se benefician a esposa de Louzán, María Teresa Cores, tamén investigada por suborno pasivo, e o exdiputado do PP Severino Reguera, ao que se consideraba responsable dun delito continuado de suborno impropio como arrendatario deses inmobles.
O auto, decretado pola sección cuarta da Audiencia de Pontevedra, explica que esta decisión está fundamentada no feito de que a propia Fiscalía renunciou a continuar coa acusación, despois que o Tribunal Superior de Xustiza de Galicia (TSXG) anule as probas derivadas da súa investigación.
O TSXG, o pasado setembro, concluíu que non cabía admitir como probas no xuízo contra Louzán, a súa esposa e o exdiputado popular todas aquelas que tivesen a súa orixe nas dilixencias de investigación levadas a cabo pola Fiscalía.
Entre estas dilixencias figuraban informes da Axencia Tributaria e os elaborados polas forzas e corpos de seguridade do Estado.
DUBIDOSA "VEROSIMILITUDE". O tribunal indicaba entón que "non cabe dúbida algunha" de que a investigación da Fiscalía foi "prospectiva" e estivo apoiada na declaración dunha persoa anónima cuxa verosimilitude "en todo o seu contido", segundo os maxistrados, "era de difícil apreciación".
O auto engadía que non é "aventurado afirmar" que ao longo deste procedemento produciuse unha "vulneración do dereito á intimidade" do expresidente da Deputación de Pontevedra.
Esta situación, recoñece a propia Fiscalía, priváballes de acudir ao xuízo con proba suficiente para demostrar a culpabilidade dos tres acusados, polo que decidiu retirar a acusación ante a imposibilidade de poder utilizar os datos obtidos na súa investigación.
