O concurso musical Operación Triunfo (OT) arrincou a súa nova edición cunha Gala 0 que serviu para coñecer aos 16 concursantes —oito mozos e oito mozas— que competirán para converterse no gañador dunha edición que se promete como a máis esixente e emocionante dos últimos anos. A coruñesa Eva Barreiro, nacida fai 19 anos en Sada, conseguiu formar parte dese grupo.
Eva, que está a cursar segundo de Arte Dramática en Vigo, traballou temporalmente como monitora de tempo libre e realizando birlos para a Televisión de Galicia (TVG). Os seus coñecementos de música son autodidactas. Gústalle escoitar a Michael Jackson, Stevie Wonder e Phil Spector, entre outros.
Para referirse a si mesma, usaría os adxectivos "rara, expresiva e alegre". De pequena quería ser actriz ou astronauta. Podería dar unha conferencia sobre o cativerio das orcas, que é un tema sobre o que está moi concienciada, ou sobre Michael Jackson.
Afeccionada ao cine clásico, asegura que lle gustaría "respirar baixo a auga" porque fai natación sincronizada . Ten moitísima fobia ás marionetas, ata o punto de ter ganas de vomitar se as ve; "incluso se alguén mete a súa man nun calcetín".
GALA. Na primeira gala de OT, emitida o pasado domingo, actuaron os 18 finalistas que se disputaron as 16 prazas da Academia do programa. Esta nova xeración de concursantes volve destacar pola súa mocidade: ata seis participantes ten menos de 20 anos e ningún supera os 25.
Os 16 concursantes definitivos son: Eli (As Palmas); Anaju (Alcañiz, Teruel), Flavio (Murcia), Nick (Barcelona), Maialen (Pamplona), Ariadna (Sant Joan Despí, Barcelona), Gèrard (Ceuta), Jesús (Barbate), Javy (Barbate), Hugo (Córdoba), Rafa (Adamuz, Córdoba), Samantha (Beniarrés, Alacante), Anne (Pamplona), Nia (As Palmas), e Bruno (Alcalá De Henares). Os dous finalistas que non entraron foron Valery (Barcelona) e Adrián (Mallorca).
