O deputado do Bloque Nacionalista Galego (BNG) Luís Bará avanzou este luns que a formación comezará o novo curso político impulsando unha axenda galega ante "a alarmante desaparición de Galicia no panorama estatal".
"Galicia está desaparecida tanto por acción do Goberno central como por omisión das sucursais galegas de PP, PSOE e Podemos; así, iniciaremos unha ofensiva nas institucións e no debate público e social para recuperar a axenda galega", asegurou Bará. Esta axenda proposta pola formación nacionalista pivotará sobre a reivindicación dun novo modelo de financiamento autonómico, da transferencia das competencias en materia enerxética, ferrroviaria ou de autoestradas, a anulación da prórroga a ENCE, a derrogación das reformas laborais e a 'Lei Mordaza' ou a devolución do patrimonio en mans da familia Franco.
"Galicia está desaparecida tanto por acción do Goberno central como por omisión das sucursais galegas de PP, PSOE e Podemos"
"O financiamento autonómico é unha cuestión pendente, que se ve afectada pola parálise institucional; nós estamos a favor dun concerto económico, pero queremos saber as posturas respecto diso dos demais partidos", precisou Bará. O deputado nacionalista aproveitou para denunciar a actitude "pusilánime e 'choromica'" da Xunta de Galicia na súa reclamación dos 700 millóns debidos polo Goberno central, unha cantidade "cuxa falta de pagamento ten que ver coa parálise institucional da que é cómplice o PP".
Bará emprazou a PPdeG e PSdeG "que planten cara" ao Goberno central ante "o continuo desprezo a Galicia" e que defendan "unha posición de país e non de partido", tendo en conta que "asumen un papel vergoñoso, intercambiándose os papeis segundo estean no Goberno ou na oposición".
A formación nacionalista seguirá trasladando unha das súas demandas históricas, como é a tarifa eléctrica galega, así como a necesidade dunha tarifa específica para a industria electrointensiva que garanta a súa rendibilidade e a súa continuidade en Galicia. En materia competencial, o BNG reclamará transferencias "ata alcanzar o nivel das comunidades autónomas co máximo teito competencial, Euskadi e Cataluña".
