O paso dunha fronte moi activa, asociado a unha cicloxénese explosiva, dará lugar á formación de Miguel, unha borrasca que este xoves deixará fortes ventos e intensas choivas en amplas zonas de Galicia, Cantabria, Asturias e en áreas do noroeste de Castela e León.
Trátase dunha borrasca "moi profunda, xerada con especial rapidez e intensidade", adiantou a Efe, Rubén Del Campo, portavoz da Axencia de MeteorologÍa (Aemet), quen explicou que está a comezar a formarse no Atlántico norte e, ao longo desta tarde e da primeira metade de mañá, é moi probable que se achegue rapidamente ao noroeste peninsular.
"O centro da borrasca non alcanzará a costa e o máis probable é que pase a uns 150 quilómetros ao norte do litoral galego, dirixíndose posteriormente cara á Bretaña francesa e o sur de Inglaterra", detallou o portavoz.
No seu percorrido peninsular deixará fortes ventos con refachos de máis de 100/120 quilómetros por hora, fenómenos costeiros adversos con ondas que alcanzarán entre 6 e 7 metros de altura e choivas que deixarán unha precipitación acumulada de 60 litros por metro cadrado en 12 horas. "Non se prevé un episodio xeneralizado de choivas, as precipitacións quedarán acoutada a zonas da costa galega", subliñou Del Campo.
ALERTA LARANXA. Ante esta situación, a Aemet activou para este xoves o aviso laranxa (risco importante) nas provincias da Coruña, Lugo e Pontevedra e en Asturias por forte ondada e por refachos máximos de vento de ata 100 quilómetros por hora.
A partir do venres ao mediodía, Miguel afastarase cara a territorio francés e a situación mellorará na península, concluíu o portavoz.
