O brote de covid-19 na zona de A Mariña lucense pasou de 22 a 28 casos activos, mentres que o de Barbanza baixou a sete –dos nove detectados–, segundo os datos actualizados este luns polas áreas sanitarias.
GALICIA. A comunidade suma dous novos casos activos con respecto a este domingo, de modo que son 312 as infeccións por SARS-CoV-2, virus causante da pandemia da Covid-19, informa o balance ofrecido este luns pola Dirección Xeral de Saúde Pública da Consellería de Sanidade.
Do total, 71 son da área da Coruña, 44 da de Lugo, 22 da de Ourense, 9 da de Pontevedra, 131 da área de Vigo, 24 da de Santiago e 11 da de Ferrol.
Catro están en unidades de hospitalización e 308 nos seus domicilios. Non hai pacientes en Uci. Desde o inicio da pandemia, hai 10.615 persoas curadas en Galicia e mantéñense en 619 os falecementos. O número de PCR realizadas é de 179.717.
