As cabinas, obxectos en perigo de extinción

Aínda quedan recordos daqueles días nos que as cabinas telefónicas eran tan frecuentes e usadas como o é o smartphone a día de hoxe. Poida que aos millenials sóelles tan lonxe como a extinción dos dinosauros, pero estas iconas dos anos noventa aínda perviven nas rúas galegas. Con todo, están tan integradas na paisaxe urbana que nin sequera somos conscientes da súa existencia.

A compañía telefónica R mantén 187 cabinas públicas na comunidade. Lugo é a provincia que menos conserva, con 11, mentres que A Coruña aínda mantén 123. Nunha segunda posición aparece Pontevedra con 84, seguida de Ourense con 13.

Uso moi escaso
'Nas cabinas nas que se detecta movemento pode facerse unha media de cinco chamadas ao mes', informa a compañía R

A recadación que presentan "é mínima e na metade delas non hai recadación mensual", sinala Malú Bergantiños, responsable de comunicación de R en Galicia. Por esta razón, os locutorios están a piques de desaparecer, pois o seu uso é mínimo na maioría dos casos. "Dende as que si se realizan chamadas pode facerse unha media de cinco ao mes", recalca a responsable de comunicación de R. "A pesar de que nos últimos anos dotóuselles de máis funcionalidades, como mandar SMS, o certo é que, sobre todo, a irrupción do móbil fixo que caesen en desuso", explican fontes de Telefónica en Galicia.

En consecuencia, as cabinas xeran perdas moi grandes. O seu custo de mantemento é "elevado", sobre todo nos casos nos que se deterioran ou son obxecto de actos vandálicos", comenta Bergantiños. Telefónica, pola súa banda, "encárgase de reparar aquelas cabinas que se estraguen", aínda que é certo que ao longo de toda Galicia atopamos numerosas cabinas en mal estado e coas ranuras para as moedas moi deterioradas.

Desbancadas polo móbil
Telefónica recoñece que 'a pesar de que se dotou ás cabinas de novos servizos como o SMS, o móbil fixo que estean en desuso'

A PIQUES DE DESAPARECER. Ata agora, o Goberno español obrigaba a manter as cabinas telefónicas a través do Real Decreto 424/2005 do 15 de abril e o Ministerio de Industria amparábase na súa consideración como "servizo universal" para soster esta normativa. O encargado do seu mantemento actualmente é Telefónica, xa que no seu día posuía o monopolio.

Con todo, a finais de ano o Goberno eliminará a obrigatoriedade de mantelas. A CNMV xa recomendou hai anos porlle fin a esa normativa, xa que, segundo un estudo da entidade, un 88% dos españois non utilizou xamais unha cabina. A pesar desta condición, o custo de manter as cabinas chegou á alcanzar os 1,2 millóns de euros en 2013.

Fin ao servizo universal
O Goberno amparábase na súa consideración como 'servizo universal' para mantelas, pero deixarán de selo a finais de ano

Fronte a esta situación, R informa que manterán "aquelas nas que se detecte uso. Polo de agora retiramos 16 cabinas e prevese que ao final do ano sexan 30 dás que prescindamos na Coruña".

Esta iniciativa que elimina a obrigatoriedade tamén afecta ás guías telefónicas, outro produto que se atopa en perigo de extinción, neste caso polo declive da información en papel fronte a, unha vez máis, internet.

Algúns dos danos que se poden apreciar nas cabinas telefónicas

Inoperativas. 'Servizo non dispoñible'
Esta mensaxe pódese ler en moitas das cabinas que existen en Galicia. Algunhas directamente non dan liña e outras tantas teñen as ranuras para as moedas en moi mal estade

Vandalismo. Lenzos para pintadas
En toda a comunidade atopamos cabinas ás que lle quitaron as terminais laterais e convertéronse en lenzos para os amantes do spray ou ben serven de taboleiro de anuncios.

Deterioración. Cables arrincados
Naquelas que mantén a compañía R é común atoparse arrincados os cables e outros elementos dos teléfonos, sinal inequívoco da visita dos amigos do alleo.