Cada galego gastará este ano 66,26 euros en comprar décimos para o Sorteo Extraordinario da Lotería de Nadal, que se celebrará como é tradicional o próximo 22 de decembro.
Está cifra supón uns tres euros máis que o gasto por habitante en Galicia en 2017 e está máis dun euro por baixo da media española (67,56 euros), segundo a cifra de consignación por habitante da Sociedade Estatal de Loterías e Apostas do Estado (SELAE). O gasto total na comunidade será de 179,4 millóns de euros.
Con todo, esta cantidade é estimativa xa que o dato será definitivo cando se reciban as devolucións de boletos non vendidos durante a campaña deste tradicional sorteo que se presentou este mércores 14 de novembro. O ano anterior, a consignación por habitante previa foi no Estado de 66,16 euros de media.
Deste xeito, os máis de 67 euros de gasto por persoa corresponden ás estimacións de venda que fai SELAE á hora de enviar os boletos ás administracións de lotería, aínda que máis tarde sempre hai unha proporción de décimos que quedan sen vender.
A comunidade autónoma que previsiblemente máis vai gastar por habitante este ano é Castela e León, cunha media de 104,02 euros, seguida de Asturias (96,32 euros), A Rioxa (94,80 euros), Aragón (91,35 euros), Comunidade de Madrid (82,29 euros), Cantabria (81,23 euros), País Vasco (76,44 euros), Comunidade Valenciana (75,10 euros), Castela-A Mancha (71,72 euros) e Galicia (66,26 euros).
Mentres, segundo os datos recollidos por Europa Press, os que menos van gastar este ano son os habitantes das cidades autónomas de Melilla (14,16 euros) e Ceuta (14,53 euros), seguidos dos de Baleares (41,12 euros), Canarias (44,87 euros), Andalucía (51,48 euros), Estremadura (55,11 euros), Cataluña (57,24 euros), Navarra (60,50 euros) e Murcia (63,26 euros).
Por comunidades autónomas, onde máis Lotería de Nadal se vai vender previsiblemente é en Madrid (535,4 millóns de euros consignados), seguida de Cataluña (432,4 millóns de euros), Andalucía (431,4 millóns de euros), Comunidade Valenciana (371 millóns de euros), Castela e León (252,3 millóns de euros), Galicia (179,4 millóns de euros), País Vasco (167,7 millóns de euros), Castela-A Mancha (145,7 millóns de euros) e Aragón (119,5 millóns de euros).
Pola contra, os que menos Lotería de Nadal teñen consignada son Ceuta e Melilla con 1,23 millóns de euros e 1,21 millón de euros, respectivamente, A Rioxa (29,8 millóns de euros), Navarra (38,9 millóns de euros), Baleares (45,8 millóns de euros), Cantabria (47,1 millóns de euros), Estremadura (59,5 millóns de euros), Murcia (93 millóns de euros), Canarias (94,5 millóns de euros) e Asturias (99,6 millóns de euros).
