Galicia inicia o terceiro fin de semana completo sen estado de alarma cunha caída da presión hospitalaria provocada polo coronavirus, xa que os ingresados descenderon en 14 e o total sitúase nos 107. Mentres tanto, os casos activos da enfermidade levan unha semana en descenso e colócanse en 2.350, medio centenar menos que o venres. Contribúe a iso que os novos contaxios detectados en 24 horas diminuíron a 110, que son 33 menos que na xornada anterior.
Os datos publicados este sábado pola Consellería de Sanidade —reunidos ata as 18.00 horas do venres— revelan que, das 107 persoas ingresadas, hai 79 en planta —14 menos— e 28 en unidades de coidados intensivos. Por áreas sanitarias, tan só na de Ourense aumenta o número de hospitalizados lixeiramente, ata os 11 en total.
No que respecta aos casos activos, seguen coa tendencia descendente por sétima xornada consecutiva, que se replica en cinco das sete áreas sanitarias. As excepcións son Lugo, con unha infección activa máis —co que chega a 234—, e Ferrol, con 83 casos activos (+3).
Con todo, a área de nbsp;&Vigo segue na cabeza con 700 pacientes, seguida de Santiago (427), A Coruña (426), Pontevedra (290) e Ourense, con 190.
Desde o inicio da pandemia a comunidade realizou 2.241.777 probas PCR, o que permite deducir que nas últimas 24 horas fixéronse 5.432. Son unhas 1.500 menos que o día anterior. Delas, deron positivo un 2%, o valor máis alto da semana, pero que segue por baixo do 5% que a Organización Mundial da Saúde (OMS) fixa para dar por controlada esta pandemia.
As persoas falecidas con covid desde o comezo da alerta sanitaria eleváronse a strong <>2.417, tras notificar este venres a Consellería de Sanidade dúas novas mortes. En todo este tempo superaron o virus 121.883 persoas, 158 máis que as rexistradas ata a xornada pasada.
