O Concello de Cambados, de onde eran orixinarios os tres mariñeiros falecidos e o desaparecido no naufraxio do Sin Querer Dos, decretará este xoves tres días de loito oficial (entre o 21 e o 23 de decembro) e celebrará ao mediodía unha concentración silenciosa en recordo duns veciños que eran "moi queridos e coñecidos" neste municipio pontevedrés.
O tenente de alcalde de Cambados, Tino Cordal, confirmou que os falecidos no naufraxio son Manuel Serén, o patrón do barco; Teófilo Rodríguez; e Bernardo Padín, mentres que permanece desaparecido Guillermo Casais, o máis novo deles, que se casou hai pouco e deixa un fillo pequeno.
Os catro eran "mariñeiros de toda a vida", "todos moi coñecidos e queridos" en Cambados, unha localidade que se atopa consternada ante "unha desgraza deste calibre", que non recordan no medio século. "Habería que remontarse ao ano 56. O pobo está consternado", relatou, emocionado, o tenente de alcalde.
Ante esta traxedia, o Concello de Cambados intentará levar a cabo este xoves "o máis rápido posible" o pleno extraordinario que xa tiñan convocado se non hai posibilidade de desconvocalo, para logo celebrar, ás 12.00 horas, unha concentración silenciosa.
As bandeiras en Cambados xa ondean a media hasta cun crespón negro por tres veciños cuxos corpos puideron ser recuperados, mentres os equipos de Salvamento loitan contra o mar para que devolva a Guillermo Casais.
CONMOCIÓN EN SANXENXO. O alcalde de Sanxenxo, Telmo Martín, afirmou este mércores que todo o muncipio está "moi consternado e afectado".
Martín lamentou a "noticia moi triste" que supón este naufraxio e mostrouse escéptico con respecto ás posibilidades de atopar con vida ao tripulante que continúa desaparecido.
En declaracións aos medios de comunicación, Telmo Martín relatou que o Sin Querer Dos viña de faenar durante catro días no Cantábrico e que tras facer escala na Coruña, onde estivo a pescar xurelo, dirixíase a Portonovo, onde tiña o seu porto base o barco naufragado.
