En plena ebulición da crise industrial, o candidato do PP á presidencia do Goberno, Pablo Casado, comprometeuse este domingo en Galicia a que ese sector "chegue a representar o 20% do PIB en 2030", para así contribuír a manter "o estado de benestar" de España. Foi a súa mensaxe durante un encontro con cargos do PPdeG en Oleiros, onde Casado se mostrou "preocupado" pola delicada situación do sector industrial galego, no que "cada semana e cada mes aparece un problema novo".
Para o líder do PP, casos como os de Alcoa ou Endesa confirman que a industria "necesita certidumbre" e non as "prohibicións" que impón o Goberno en funcións do PSOE á hora afrontar a transición ecolóxica. Por iso, os populares apostan por "incentivos" para que se teña en conta "ás familias de toda Galicia" sustentadas pola industria.
A este respecto, Casado opina que "as persoas e as familias non saben a que aterse ante un Goberno que bloquea as accións que propón a Xunta", como ocorre por exemplo con Ence. Tanto neste caso como no de Alcoa ou Endesa, recorda que a clave é "buscar solucións", non escoitar "leccións da esquerda" sobre transición, cando o PP foi o Goberno que "ratificou o Protocolo de Kioto sobre o cambio climático e o Acordo de París". Por todo iso, aposta por unha transición enerxética "lóxica e responsable".
E igual de directo foi Alberto Núñez Feijóo, que atribuíu a crise industrial galega aos socialistas. "A situación non é casualidade, senón causalidade" e esa causa "é o PSOE". Para Feijóo, a problemática de Alcoa, Ence, Megasa, Navantia e, na máis recente actualidade, Endesa, son froito da actitude dun PSOE, que "nunca creu en Galicia".
Feijóo: "A problemática da nosa industria non é casualidade, é causalidade; e a causa é o PSOE, porque nunca creu en Galicia"
Ademais, ao seu xuízo, o Goberno de Sánchez non só é a causa do "desmantelamento" do tecido industrial que sofre Galicia, senón tamén da desaceleración económica, a "asfixia financeira", do feito de que se fale de aumento "do desemprego no canto de paro" e, sobre todo, da repetición dunhas novas eleccións.
"Galicia necesita políticas e gobernos solventes", porque "estamos nunha situación de incomodidade", proclamou o líder do PPdeG, que aproveitou para reclamar unha vez máis os 700 millóns que debe o Goberno central. Tamén destacou a baixada de investimento do Goberno do PSOE en Galicia ou as dúbidas co prazo da Ave ou a transferencia da AP-9.
AVE. Casado garantiu que se el chega á presidencia do Goberno "o Ave chegará a Galicia nos prazos pactados". Respecto do financiamento autonómico, comprometeuse a pagar o que teñan que recibir as comunidades no tempo pactado goberne quen goberne en cada territorio. E potenciará a FP, o bilingüismo e o trilingüismo en zonas con lingua cooficial.
O presidente do PP recordou por exemplo que o líder de Más País, Íñigo Errejón, comprometeuse a non presentarse onde poida prexudicar as posibilidades de sacar escanos da esquerda. Segundo Casado, estas eleccións "van de desbloqueo" e "se a xente quere desbloqueo, só pode votar ao PP". "¿Por que os españois van pensar que o PSOE vai cambiar e agora vai poder desbloquear a situación?", preguntouse o palentino.
Na mesma liña, Alberto Núñez Feijóo recordou que "só hai unha posibilidade de cambiar o Goberno", e é unindo o voto no Partido Popular. "Se dividimos o voto, o Partido Socialista será a primeira forza", advertiu.
Feijóo, que recordou que os galegos están "cansados, decepcionados e molestos" co Goberno central, agradeceu a Casado todas as veces que acudiu a Galicia, xusto ao contrario que Pedro Sánchez, cuxa primeira visita "como presidente do Goberno" foi o sábado, no Foro La Toja.
