Galicia comeza esta semana con 2.481 casos activos de covid-19, un 7,5% menos que hai sete días, froito dun descenso que é xeneralizado en todas as áreas sanitarias salvo en Vigo. Alí as infeccións activas subiron un 10,8% na última semana.
Atendendo aos datos do Servizo Galego de Saúde, ata as 18.00 horas do domingo contabilizábanse en Galicia eses 2.481 casos activos, que son 38 menos que os computados en domingo, en cifras similares ás do pasado agosto.
Están hospitalizados 49 pacientes con covid-19 nas unidades de críticos da comunidade, dous menos que o día anterior e un 33% menos que hai unha semana. As persoas ingresadas en planta eran 215, as mesmas que o día anterior e un 14% menos que hai sete.
Ademais, os novos contaxios ascenden a 103, catro menos que o domingo e un 8% por baixo da cifra dunha semana antes.
Desde o inicio da pandemia contaxiáronse en Galicia 115.842 persoas, das que 111.061 superaron o virus e 2.320 faleceron.
Por áreas sanitarias, A Coruña segue sendo agora a máis afectada, con 959 casos activos, tras sumar 25 novos positivos por PCR, aínda que logrou reducir un 9% os casos na última semana.
A área de Vigo volve subir e suma 500 casos activos (14 máis), tras 36 novos positivos por PCR, doce máis que o día anterior. Pontevedra supera de novo os 200 casos activos (con 208), oito máis que o día anterior, tras sumar nove positivos novos por PCR, aínda que baixou un 14,8% os casos na última semana.
No resto de áreas os descensos nos últimos sete días oscilan entre o 5% de Lugo, ata os 193 e o 20% de Ferrol, que ten 197 casos. Na área de Santiago a baixada na última semana é dun 9,4%, ata os 271 casos, e na de Ourense a caída de casos chega ao 17,8% nunha semana, para quedar en 153.
