Catro falecidos en residencias de Ourense elevan a 790 as vítimas en Galicia

Son tres homes e unha muller usuarias de centros de Monterrei e Pereiro de Aguiar
Un gato pasa xunto a unha fileira de colectores de lixo no exterior da residencia dos Gozos. BRAIS LORENZO (EFE)
photo_camera Un gato pasa xunto a unha fileira de colectores de lixo no exterior da residencia dos Gozos. BRAIS LORENZO (EFE)

A Consellería de Sanidade notificou este martes catro novos falecementos vinculados con covid-19 na comunidade, todos eles relacionados con residencias de maiores da provincia de Ourense. Con iso, a cifra de mortos pola pandemia ascende xa a 790 persoas. 

En concreto, os últimos falecidos son dous homes, de 80 e 88 anos, que se atopaban ingresados no Hospital Público de Verín e que procedían da residencia de maiores Val de Monterrei. 

Este mesmo centro rexistrou tamén o falecemento doutro dos seus usuarios, un home de 88 anos, mentres que a cuarta morte é a dunha muller de 89 anos da residencia Os Gozos de Pereiro de Aguiar. 

Dáse a circunstancia de que na xornada do luns o único falecido notificado foi un home de 84 anos usuario tamén da residencia Os Gozos, da que proviña tamén unha muller de 94 anos que faleceu o domingo. 

Con estas últimas vítimas, a cifra total desde o comezo da nova normalidade ascende a 169 en Galicia. A primeira morte deste período foi a dunha muller o 7 de agosto. Antes diso, a comunidade galega había encadeado case dous meses –desde o 10 de xuño– sen decesos relacionados co coronavirus. 

Comentarios