O grupo de investigadores da Universidade de Santiago de Compostela (USC) recibiu financiamento da Comisión Europea para facer probas preclínicas moi completas en animais de experimentación para o desenvolvemento dunha vacina contra a covid-19. A axuda da Comisión Europea é para un equipo do laboratorio de investigación Ciqus da USC, dirixido polo profesor José Martínez Costas.
Se os resultados son satisfactorios, o equipo poderá "chegar ata a fase clínica de ensaios en humanos", explica Martínez Costas. A investigación leva a cabo en colaboración co grupo do investigador Javier Ortego en laboratorio de investigación Cisa-Inia.
O financiamento da Comisión Europea permite proseguir o camiño para investigar unha vacina contra o coronavirus iniciado en abril pasado ao amparo do Instituto Carlos III de Madrid, o que supón "un importante impulso ao noso traballo", segundo Martínez Costas.
O equipo galego traballa no desenvolvemento dunha vacina cunha nova metodoloxía desenvolvida no propio centro e patentada pola USC que permite resultados en marxes de tempo reducidos e a baixo custo, indica a institución académica compostelá.
O profesor Martínez Costas explica que esta liña de traballo permite producir vacinas contra calquera patóxeno: "Facemos que células de calquera orixe fabriquen microesferas e introduzan dentro delas os antíxenos víricos".
Estas partículas, argumenta o investigador, "se purifican moi facilmente e teñen capacidade intrínseca para estimular o sistema inmune, o que as converte en ideais como vacinas para o coronavirus, enfermidade que afecta principalmente a persoas de idade avanzada cuxo sistema inmune adoita estar debilitado".
