Centos de persoas manifestáronse este domingo en distintas localidades de España para denunciar a proliferación das casas de xogo e reivindicar un lecer "digno e alternativo" a este tipo de negocios que —aseguran— "están a destruír" os barrios das cidades. As protestas tiveron lugar en Madrid, A Coruña, Boiro, Santiago, Cartaxena, Granada e Alxeciras (Cádiz) e denunciaron os efectos perniciosos desta actividade no colectivo dos mozos.
Unha das marchas que máis xente congregou foi a de Madrid, que discorreu desde a glorieta de Catro Camiños ata Tetúan, pola rúa Bravo Murillo, un tramo onde hai "unha casa de apostas cada 100 metros", o que "simboliza a problemática" que hai en España. Así o denunciou a Efe o portavoz da Plataforma contra os locais de apostas en Madrid (convocante da marcha), Adrián Belaire, que explicou que o obxectivo é comezar unha "loita constante, diaria e comprometida" para lograr "o fin das casas de apostas, que están a destruír os nosos barrios".
Por iso, avogou por unha "eliminación total" deste tipo de negocios: "Non nos vale ningún tipo de regulación. 20 casas de apostas son un problema, pero unha soa tamén", sostivo.
Durante o case quilómetro e medio de percorrido, os manifestantes pararon ante todas as casas de apostas —ao redor dunha decena—, que de forma inusual pecharan na mañá do domingo.
En Galicia, ao redor de 150 persoas de diversos colectivos sociais concentráronse pola tarde baixo a lema Fóra as casas de apostas dos nosos barrios para esixir o peche destes locais e a ilegalización de todo tipo de xogo ligado ao mundo das apostas.
Antes da celebración das protestas, a patronal do xogo privado en España (Cejuego) remarcou que o xogo é unha actividade "legal, regulada e normalizada" na sociedade española, negou que haxa un problema de acceso a menores nos salóns e considerou que se está creando unha alarma social irreal e innecesaria".
