Un ciclista resultou ferido de gravidade este mércores tras ser alcanzado por un camión cando circulaba pola Avenida de Val Miñor, no Concello pontevedrés de Nigrán. O 112 Galicia recibiu a alerta ás 11.20 horas e, nese momento, informou os membros do GES de Val Miñor e aos axentes da Policía Local.
Pola súa banda, os profesionais sanitarios xa estaban a enviar unha dotación ao momento para a atención da vítima que, segundo os servizos de urxencias alí desprazados, presentaba lesións de carácter grave. Finalmente, foi evacuado nunha ambulancia do 061-Urxencias Sanitarias ao centro hospitalario de referencia.
Con respecto ao condutor do camión, resultou ileso e a carga do vehículo, que transportaba gasóleo, intacta.
PORTO DO SON. Noutro sinistro, ocorrido no Concello coruñés de Porto do Son, víronse implicados un autobús de pasaxeiros, que realizaba a ruta Ribeira-Noia, e un turismo. Os ocupantes do autocar, aproximadamente 15 persoas, resultaron ilesos, mentres que o condutor do coche necesitou asistencia médica aínda que as lesións que presentaba eran de carácter leve.
