O sindicato CIG presentou un conflito colectivo no Tribunal Superior de Xustiza de Galicia contra a Xunta polo "abuso e explotación laboral" que, segundo asegura, está a padecer o persoal encargado da limpeza dos centros educativos. Nun comunicado, a central nacionalista denuncia que a Consellería de Cultura, Educación e Universidade "impuxo novos horarios e triplicou a carga de traballo" para atender as necesidades derivadas da covid-19, pero non realizou "nin unha soa nova contratación" para reforzar estas tarefas.
Estes cambios levaron a cabo, indican, "sen ningún tipo de negociación previa" coa representación do persoal que establece a Lei. "A pandemia non pode ser escusa para modificar a xornada laboral nin para triplicar a carga de traballo, xa que supón un desprezo ás tarefas máis esenciais para combater a crise sanitaria como son a hixienización e a limpeza", argumenta o sindicato.
A situación xerou, aseguran, un aumento de carga de traballo "insostíbel" para cumprir os protocolos de seguridade, chegando a triplicarse, ademais de xornadas prolongadas e cambios de horario: xornadas de tarde a nocturno de 22.00 a 6,00 horas ou a partido, entre outras.
