O secretario xeral da CIG, Paulo Carril, anunciou este martes a suspensión da folga xeral convocada para o próximo 19 de xuño ata comprobar se o novo Goberno socialista aborda un calendario de reformas que empeza coa derrogación da reforma laboral.
Nunha rolda de prensa na sede do sindicato na capital galega, Carril recordou que o pasado Primeiro de Maio, Día do Traballo, convocou unha folga xeral para o próximo 19 de xuño, que non foi apoiada polo resto de sindicatos, aos que afeou a "inutilidade do que representan na defensa da clase traballadora".
A CIG expuxera o paro como "unha moción de censura da clase traballadora ante a situación grave de urxencia nacional e urxencia social pola crise institucional, política, social e económica", detallou.
O obxectivo era "recuperar os dereitos laborais roubados" e "demandar o fin dun goberno do Partido Popular que con minoría parlamentaria e cheo de corrupción mantiña con man de ferro estas políticas".
Agora, tras o cambio no Goberno, que agora ten na presidencia ao socialista Pedro Sánchez, o sindicato decide suspender a folga e dar "uns meses" para analizar as súas políticas.
"Temos que suspendela uns meses ata comprobar que se o novo goberno do Partido Socialista e a nova correlación de forzas son capaces de abordar un calendario para derrogar todas estas reformas e para levar adiante as reivindicacións que están presentes na folga", destacou Carril.
Reclama derrogar as reformas laborais, avances reais para as mulleres, defender as pensións públicas, acabar cos abusos da patronal, frear o recorte nas políticas para desempregados, acabar coa privatización dos servizos públicos, pór fin ao retroceso das liberdades e os dereitos fundamentais e o dereito a vivir "e traballar" en Galicia con emprego, "salarios e pensións dignas".
Para el, a "caída do Partido Popular" é "o primeiro paso" cara ás súas reivindicacións, aínda que recorda que sabe "quen é o PSOE, que é corresponsable co Partido Popular destas políticas".
"Esperaremos e estaremos atentos, seguiremos na mobilización e na reivindicación", avanzou antes duns meses que "determinarán" se se recupera a convocatoria de folga.
A CIG aposta "duro e con valentía por cambiar esta situación" que sirva para "mellorar as condicións de vida" e conseguir "un futuro digno" fronte a uns sindicatos que estiveron "calados, pasivos, cando non foron colaboradores" e hoxe "quedan en evidencia".
