Catro persoas resultaron feridas este xoves pola mañá nun choque en cadea no que se viron implicados un total de oito vehículos en Vigo. Sucedeu na AP-9 ao fío das 5.45 horas, concretamente no punto quilométrico 2,300, no interior do túnel que se atopa antes da saída da Avenida Buenos Aires.
Segundo os datos facilitados ao 112 Galicia, a intensa sarabia que caeu nese momento na vía de circulación propiciou que os vehículos escorregasen e chocasen uns cos outros, o que provocou retencións ao longo de dous quilómetros.
Varias persoas particulares contactaron co 112 Galicia para alertar do ocorrido. Enseguida, os xestores do CIAE-112 puxeron a situación en coñecemento da Garda Civil de Tráfico, do servizo de mantemento da vía, das 061-Urxencias Sanitarias, da Policía Local e dos Bombeiros de Vigo.
COLISIÓN MÚLTIPLE. Tamén en Vigo, este mércores pola tarde tivo lugar unha colisión múltiple na rotonda de Ricardo Mella, nas proximidades da VG-20. Foron un total de catro vehículos os que chocaron e unha persoa, que resultou ferida leve, foi trasladada ao hospital Povisa.
Nada máis ter constancia do accidente ás 17.15 horas a través dunha persoa particular, o persoal do 112 Galicia pasou o aviso ás 061-Urxencias Sanitarias, á Policía Local, aos Bombeiros de Vigo e a Protección Civil.
