Na trixésima sesión do xuízo coñecido como dos 'Miguelianos' chegou a quenda dos informes finais das partes. O Ministerio Fiscal considera probada a "estrutura" sectaria do grupo e os delitos de abusos cometidos por Miguel Rosendo que se desprenden de varias testificales. Pola súa banda, a acusación particular mantén que o líder e fundador da Orden y Mandato de San Miguel Arcángel tivo unha "conduta criminal" cos que eran os seus acólitos.
Pola Audiencia de Pontevedra desfilaron, ademais dos acusados, 118 persoas, entre testemuñas e peritos.
A causa quedou este martes vista para sentenza na sección cuarta da Audiencia Provincial de Pontevedra, tras unha trixésima sesión que se alargou máis de nove horas. O tribunal terá que ditar antes do día 11 de decembro –data na que se cumpren o catro anos de prisión preventiva do líder do grupo, Miguel Rosendo– ou o acusado principal sairá en liberdade provisional pois xa non caben prórrogas.
MIGUEL ROSENDO. O líder da Orden y Mandato San Miguel Arcángel, Miguel Rosendo, fixo uso da súa última oportunidade para dirixirse á sala para asegurar que "nunca" quixo "romper a liberdade" de ninguén no seo desta organización, recoñecida pola Igrexa como asociación pública de fieis.
Rosendo tivo palabras de agradecemento para o seu avogado e para quen "creron" na súa inocencia, e deu grazas a deus por poder coñecer a todos os que formaban parte da extinta orde, incluídas as persoas que o acusan de abusos sexuais e coaccións.
Afirmou que lle doe profundamente" que o sinalen como líder, fundador da orde dos Miguelianos ou como "pai". Polo demais, aseverou que "nunca" a orde "desobedeceu ningún mandato da Igrexa", e engadiu que todo canto fixo foi "posto en mans e coñecemento dos bispos".
A Fiscalía considera probada a "estrutura" sectaria dos Miguelianos e os 'abusos' de Rosendo
INFORME DA FISCALÍA. O fiscal da causa, Juan Pablo Martínez, sostivo que tras a proba practicada considera probada a "estrutura" de "seita" da Orden y Mandato de San Miguel Arcángel con Miguel Rosendo "na cúspide" e que das diferentes testificales despréndese que non se facía nada sen o consentimento" do líder.
O fiscal manifestou que nos Miguelianos produciuse unha "despersonalización" dos membros propia dunha "estrutura" de "asociación ilícita" e describiu como o líder foi "fraguando a docilidade das vítimas" en base a unha técnica de "premios" e "castigos", así como que varios testemuños recoñeceron que Rosendo converteuse en alguén "imprescindible" para eles.
Por todo isto, o Ministerio Fiscal pide de 66 anos de prisión para Miguel Rosendo por un delito de asociación ilícita, 12 contra a integridade moral, cinco de coaccións e tres contra a liberdade sexual –un de agresión sexual continuado e dúas de abuso sexual continuado–.
O fiscal ratificouse nas súas peticións para os outros seis membros da Orden y Mandato de San Miguel Arcángel acusados. Mantén que Ivana Lima, Belén Esmerodes, José Carlos Acevedo e Iria Quiñones sexan condenados a dous anos de prisión por asociación ilícita. No entanto, para os acusados –e tamén considerados vítimas– Esteban Riobó e Dores Espiñeira o Ministerio Fiscal ha reducido a petición de pena a 11 meses de prisión e 12 meses de multa a razón de seis euros cada día, un total de 2.160 euros.
Así mesmo, o fiscal pide que se aplique a "liberdade vixiada" como medida de seguridade e "tratamentos externos" para que sexan asistidos psiquiátricamente xa que aprecia neles "eximentes incompletas de afectación da capacidade intelectiva e volictiva", é dicir, que ve comprometidas a súa capacidade de decisión e a súa vontade.
A avogada da acusación, Ana Reguera, manifestou que Rosendo 'apropiouse' das mentes dos membros do grupo a través do 'engano espiritual'
"PASIVIDADE" DA IGREXA. Respecto da responsabilidade civil subsidiaria do Bispado de Tui-Vigo, que se fundamentou en que "a constitución e funcionamento da Orden y Mandato de San Miguel Arcángel estivo amparada e actuaba ao servizo e baixo a dependencia do Bispado", o fiscal engadiu que houbo unha "actitude pasiva" por parte da Igrexa ao non reaccionar en 2006 cando a nai dun membro da Orde alertou ao bispo Luis Quinteiro Fiuza de "comportamentos raros" no grupo.
INFORME DA ACUSACIÓN PARTICULAR. A avogada da acusación, Ana Reguera, que representa a familiares e exmiembros da Orde, manifestou que Rosendo apropiouse" das mentes dos membros do grupo a través do "engano espiritual" e dunha sucesión de "episodios fantasmagóricos" asumidos polas presuntas vítimas "sen cuestionarllos".
A acusación particular, pola súa banda, solicita un total de "82 anos" de prisión para o líder da Orde, ao que considera autor dunha vintena de infraccións penais, incluídos delitos de agresión sexual continuada, coaccións, lesións psíquicas, contra a integridade moral, estafa ou subsidiariamente de apropiación indebida e contra os dereitos dos traballadores.
DEFENSA. Pola súa banda, o avogado de Miguel Rosendo, Marcos García Montes, insistiu en solicitar a libre absolución do seu cliente e a súa inmediata posta en liberdade provisional, a punto como está de cumprir o próximo 11 de decembro o tope de catro anos de prisión preventiva.
"Non quere vinganza, nin –ten desexos de prexudicar a ninguén, senón a súa liberdade e inocencia", proclamou García Montes.
