O Comité de Empresa da fábrica de aluminios de Alcoa na Coruña agradeceu o apoio político e cidadán que recibiu nas protestas que están a desenvolver, por mor de que a multinacional norteamericana presentou un Ere extintivo que suporía o peche da fábrica coruñesa e a situada en Avilés.
Así mesmo, o Comité avanza que os traballadores seguirán "loitando" para evitar a medida, que supón o despedimento de case 700 operarios directos. Así o transmite nun comunicado remitido aos medios de comunicación, no que agradece "o enorme apoio e agarimo recibido na loita", no día despois da manifestación que congregou a preto de 6.000 persoas na Coruña.
En concreto, transmiten o seu agradecemento a todos "os traballadores, incluídas as empresas auxiliares, a excompañeiros de traballo", aos compañeiros da fábrica de Avilés e das plantas de San Cibrao -que tamén se manifestaron o sábado na Coruña- e ás "coruñesas e coruñeses".
Na mesma liña, trasladan o seu agradecemento a toda "a corporación municipal do Concello, co alcalde á cabeza" e aos "concellos da área metropolitana", así como " Xunta de Galicia e ao presidente, cargos das distintas administracións, partidos políticos, sindicatos e Comités doutras empresas, asociacións e movementos sociais, etc".
Un apoio que destacan que "se fixo visible na manifestación" deste sábado e que "se se puidese transformar en enerxía eléctrica resolvería o problema -da planta de Alcoa- para sempre e o de todos os consumidores".
Pero ademais, o Comité tamén avanza que continuará coas protestas. "Seguiremos loitando e estamos convencidos, agora máis que nunca, se cabe, que con todo o agarimo e apoio que estamos a recibir gañaremos". "Loitaremos e venceremos", proclama.
Finalmente, conclúen pedindo desculpas "se en calquera momento e se durante esta loita" entorpecen "un pouco" e indican que intentarán "no posible facer visible" o seu "grave problema buscando sempre o menor impacto para todos".
