O concello da Coruña leva ao Pleno unha moción impulsada polo Colectivo de presas e presos de Galicia na ditadura para a retirada do título de Fillo Adoptivo a Manuel Fraga e Laureano López Rodó como ministros durante a ditadura de Franco, que sairá adiante ao contar co respaldo da maioría do pleno. Segundo confirmou Efe antes da celebración da sesión plenaria, Marea Atlántica, PSOE e BNG apoiarán a petición, mentres o PP declinou contestar á pregunta de Efe á espera da súa intervención durante o Pleno municipal.
Aínda que se solicitou que a proposta de moción chegue ao Pleno de forma conxunta, finalmente é o BNG o único grupo político que leva a iniciativa dentro da orde do día xa que “non foi posible” un acordo conxunto, a pesar de que o partido nacionalista solicitoullo ao resto de portavoces municipais.
En todo caso, Avia Vieira (BNG) manifestou que o seu partido promoveu a moción dos presos da ditadura porque un “título que se dá a un ministro na ditadura non pode ser un título vixente en plena democracia e é de xustiza retirar esta honra”, explicou.
Pola súa banda, a portavoz do PSOE, Yoya Neira, adiantou a Efe que o seu grupo votará a favor da retirada do título honorífico a Fraga e a Rodó, aínda que na súa quenda de palabra durante o plano distinguirá “entre o Fraga presidente autonómico e pai da Constitución, e aí non nos oporiamos a ningún tipo de título ou condecoración, pero si consideramos este caso porque é un título que se concede durante un réxime fascista que, loxicamente, entra nese catálogo de aplicación da Lei da memoria histórica”, abundou.
Manuel Monge, un dos impulsores da iniciativa coa que se pretende iniciar os trámites para retirar o título honorífico á figura de Manuel Fraga vinculada á súa etapa como ministro da ditadura, confesou que se trata dun día “histórico” porque hai dez anos o concello da Coruña “retiroullo a oito ministros de Franco e amnistiou a Fraga e Rodó e hoxe, a ambos, chégalles o fin da amnistía”, valorou.
Manuel Monge confirmou que a Marea Atlántica adiantoulle o sentido do seu voto favorable á moción que presentará ao longo da tarde o BNG.
“A moción vai recoller a vontade do pleno maioritario e vai quedar claro que a vontade é retirar a Fraga a distinción, será nun prazo máis ou menos longo, pero esta é unha vitoria”, dixo Manuel Monge, que non ve perigar a decisión que tome o concello a pesar de que en vinte días os comicios locais poderían cambiar a cor da corporación municipal.
Ao seu xuízo, trátase dun asunto que “pode quedar resolto nos próximos días, antes das eleccións, e, en todo caso, é unha vontade que se van manter independentemente do resultado das próximas eleccións”, argumentou convencido.
A proposta de retirada do título honorífico a Manuel Fraga baséase, para o colectivo impulsor, na Lei de Memoria Histórica aprobada en decembro de 2007 e pola que se pide para este caso a súa aplicación, unha proposta que o colectivo enmarcou entre as decisións adoptadas o 17 de decembro de 2008 pola Comisión para a Recuperación da Memoria Histórica da Coruña -CRMH- na que se solicitou a eliminación da simboloxía franquista na Coruña, baixo o título “Tolerancia cero co franquismo”.
O colectivo recordou que unha moción similar saíu adiante no Pleno de Ferrol sobre Manuel Fraga, cos votos de Ferrol En Común, PSOE e BNG, e en Santiago de Compostela sobre López Rodó, cos votos de Compostela Aberta, PSOE e BNG.
