A sección sexta da Audiencia Provincial da Coruña, con sede en Santiago, condenou a cada un dos membros dunha exparella —un home e unha muller— a 19 e 18 anos de cárcere, respectivamente, por asasinar a unha muller que supostamente lles compraba droga e debíalles diñeiro en xuño de 2015 nunha leira da Pobra do Caramiñal. O veredicto vai na liña do expresado polo xurado popular, que xa considerara probada a culpabilidade de ambos.
Segundo o fallo divulgado polo Tribunal Superior de Xustiza de Galicia, a el impónselle un ano máis por reincidencia. En suma, a Audiencia, de acordo co veredicto de culpabilidade emitido polo Tribunal do Xurado, tivo en conta o agravante de abuso de superioridade.
Os imputados deberán abonar, así mesmo, unha indemnización de 350.000 euros aos tres fillos, á irmá e á nai da vítima.
