O Xulgado do Social de Vigo declarou nulo o despedimento dunha traballadora que denunciou que PSA-Citroën obrigábaa a concatenar contratos e condenou ao grupo a readmitila e indemnizala con 6.000 euros.
Ante a sentenza cabe recurso ante o Tribunal Superior de Xustiza de Galicia, aínda que segundo Víctor Mariño, representante da CUT en Citroën-PSA, "a sentenza de Vigo pecha bastante a posibilidade de recurso".
A CUT considera a sentenza unha pequena vitoria fronte á política de contratación do grupo automobilístico, e na mañá deste xoves un grupo de sindicados concentráronse ás portas da factoría no cambio de quenda dos traballadores para comunicarlles a noticia e arroupar á traballadora que denunciou na súa volta ao traballo.
Segundo Mariño, a sentenza "abre a porta" a que se produzan outras semellantes porque "recolle a alta temporalidade da fábrica e a alta taxa de contratos a tempo parcial que, como a propia inspección recoñece, teñen que ser para temas puntuais de produción e non utilizados como argumento sistemático como os utiliza PSA".
Ademais, a sentenza pon en cuestión, segundo a CUT, o "discurso" do director da factoría de PSA en Vigo, Ignacio Bueno, quen avoga por flexibilizar as condicións laborais dos traballadores.
"Temos que flexibilizar as condicións laborais e precarizarlas cando os propios xulgados e a propia inspección recoñecen que a precariedade laboral en Citroën vai máis aló do legalmente establecido", dixo Mariño.