Un vilagarcián terá que dar explicacións, cando sexa chamado a declarar nunha sede xudicial, sobre un accidente rexistrado á primeira hora da noite do día 30 en Portas, que se saldou con tres persoas feridas (dúas delas nenos) e danos en catro vehículos (dous atopábanse estacionados e baleiros). O presunto responsable ten 36 anos e foi identificado despois de que fuxise correndo do lugar dos feitos.
Un portavoz do Servizo Municipal de Emerxencias de Cuntis explicou que eran a 21.35 horas cando un Peugeot 2006 (familiar) incorporábase á estrada despois de que a súa condutora comprase unhas pizzas nun establecemento de hostalería situado nun tramo recto, onde tamén está instalada unha empresa de venda de maquinaria agrícola. Cando xa realizara a manobra, logo de indicala con anticipación, e dispúñase a enfilar en dirección a Lantaño, un Nissan (modelo antigo), encaixouse contra a súa parte traseira. Foi tal a intensidade do impacto que esmagou por completou o maleteiro, e como consecuencia do golpe, quedou envorcado nunha cuneta.
Ademais do estado en que quedou o Peugeot 206, outro apuntamento que pode servir para facerse unha idea da velocidade á que circulaba o Nissan (nun tramo onde está prohibido adiantar e está limitada a 50 quilómetros por hora) é que a pegada que deixaron as súas rodas quedou impresa sobre o asfalto ao longo dun tramo duns sesenta metros de lonxitude.
Os efectivos do Servizo Municipal de Emerxencias de Cuntis sinalaron que o choque por alcance tivo lugar despois de que o condutor do Nissan adiantase a varios vehículos, e tras o golpe deu varios trompos ata quedar cruzado na vía.
Tanto pola hora na que se rexistrou este suceso como o lugar, onde están asentados varios establecementos de hostalería, o accidente contou con varias testemuñas. Algúns se botaron as mans á cabeza ao observar o vehículo circulando a unha velocidade moi alta, e o asombro deu paso á incredulidade cando o seu condutor (e único ocupante) botou a correr, fuxindo do escenario da colisión.
As tres vítimas foron trasladadas ao Hospital Domínguez de Pontevedra. No operativo de urxencia tamén participaron a Garda Civil de Tráfico e Protección Civil de Portas.
