A Sala do Civil e Penal do Tribunal Superior de Xustiza de Galicia confirmou a condena de sete anos de cárcere a un traficante de droga que intentou apuñalar a un consumidor porque lle pagou dez céntimos menos do que acordaran.
A vítima logrou evitar que o acusado lle cravase a arma, pero resultou lesionada durante forcexo para tratar de arrebatarlla.
O alto tribunal galego ratifica a pena de prisión que lle impuxo orixinalmente a sección quinta da Audiencia de Pontevedra, con sede en Vigo.
Os maxistrados desestimaron o recurso de apelación presentado pola defensa porque consideran que a sentenza de primeira instancia está "fundada en suficiente proba de cargo".
Consideran que o acusado ofreceu versións "contraditorias" e "incompatibles" coas lesións que presentaba a vítima. Tampouco deron crédito a que as sustancias estupefacientes comisadas na súa vivenda fosen para consumo propio.
